KJKyî bi wesîleya serrgêra diyîne ya Şorişê Jin, Jiyan, Azadî eşkerayîyêke daye. Eşkerayîye wina ya:

''Serrgêra diyîne ya Şorişê Jin, Jiyan, Azadî de ma şexsê Şilêre Resulî û Jîna Emînî de pêro şehîdanê şorişî bi minet û rêzî yad kenê û soz danê ke xeyalanê nînan bîyarê ca. Ma sere de mîmarê felsefeya Jin, Jiyan, Azadî Rayber Apoyî pêro cinîyan û şaranê Îranî rê nê şorişî fîraz kenê.

Çalakîya Şilêre Resûlî bîye çeqa verêne ya Şorişê Jin, Jiyan, Azadî. Çalakîya aye xokiştiş nêbîye, çalakîya namusî nêbîye. Çalakîya aye vera ferasetê tecawuzî yê sîstemê camêrdan çalakîya estbîyayîşî bîye. Ma şexsê aye de xoverdayîşê cinîyan ê Merîwanî selam kenê.

Ma şehîdanê Şorişê Jin, Jiyan, Azadî selam kenê. Girîng bi ke dadî û keyeyê nê şehîdan wayîrê şorişî vejîyê. Ma pêro cinîyanê ke tewrê nê şorişî bîyê selam kenê. Ma çalakîyanê Hîndîstanî yê vera tecawuzan zî selam kenê.

Jîna Emînîya 22 serrî 13ê êlula 2022yî de seba ke gijikê ci asayêne raşta îşkenceyê polîsanê exlaqî amebî û 16ê êlule de zî dinyaya xo bedilnabî. Cenazaya ci vurîyabî serewedaritişêk. 16ê êlule rotaya xoverdayîşanê dinya belu kerde. Tesbîtê Rayber Apoyî yê 'Seserra 21ine do biba seserra cinîyan' ra dima felsefeya ey Jin, Jiyan, Azadî xerîteya rayîrî ya cinîyan ê dinya eşkera kerde.

Rejîmê Îranî bi qetilkerdişê Jîna Emînî waşt ke komel bitersno la cinîyan û şaran vengê xo hîna zaf vetî û no veng bi qîrayîşê azadîye. Cinîyan şehîd û bedelê pîlî dayî. Cinîyan Îran û Rojhelatê Kurdîstanî de laçikê xo akerdî, gijikê xo qesnayî û nê kerdî alê azadîye. 

Nêrazîbîyayîşê vera nê qetilkerdişî pêro dinya de hêvîya xoverdayîş û cuya azade ya cinîyan pîl kerde. Yanî Jîna sey manaya nameyê xo seba pêro cinîyan ê Îran, Rojhelatê Kurdîstanî û dinya bîye cuyêka newîye, jin û jiyan.

Şexsê Jîna de sloganê Jin, Jiyan, Azadî bi manîfestoyê têgêrayîşê azadîye yê cinîyan. Şorişê Jin, Jiyan, Azadî zî mojna ke cinîyî, şarî, bawerî, kulturî û bindestî eşkenê referansanê dewleta netewe û sîstemê kolonyalîzmî birijnê û cuya azade û têdûşte awan bikerê. Şorişê Jin, Jiyan, Azadî Rojhelatê Kurdîstanî û Îran de bi wayîrê taybetmendîya pêserardişî. Qet yew çi do nêeşko verê nê şorişî û tesîranê ci bigêro. 

Rixmê teda, hêriş û gefanê îdamî yê rejîmê Îranî zî dînamîzmê Şorişê Jin, Jiyan, Azadî dewam keno. Ewro xoverdayîş û tewirê cinîyan ê sey Zeynebe Celalîyan kenê ke çalakîyî mende bibê. Ancî cinîyê sey Gulruxî Irayî, Nergiz Muhammedî, Spîde Qolyan bîyî sembolê cinîyan ê Îranî. Ewro sere de Pexşane Ezîzî û Şerîde Muhammed ma xoverdayîşê pêro cinîyanê ke bi îdamî yenê tehdîtkerdene selam kenê. Eke çalakîyê vera îdamî bêrê xurtkerdene têkoşînê cinîyan do ser bikewo.

Nê esasî ser o ma venga pêro cinîyan danê ke her ca de Hemleya 'Dardekerdişî rê Ney, Cuya Azade rê Heya' ya KJARî rê destek bidê, na çarçewe de çalakîyan bikerê, na hemle pîlêr bikerê.

Ma serrgêra Şorişê Jin, Jiyan, Azadî de xoverdayîş û serewedaritişê cinîyan pîlêr bikerê!

Ma pêro parçeyanê Kurdîstanî de vera tecawuzan, qirkerdişan û hêrişan xoverdayîşî berzêr bikerê!

Ma cuya azadîgîra cinîyan, ekolojîke û demokratîke awan bikerê!

Ma tewrê prosesê Şorişê Cinîyan ê Rojhelatê Mîyanênî û Konfederalîzmê Cinîyan ê Demokratîkî yê Dinya bibê û bi Jin, Jiyan, Azadî ma azadîye ser bivisnê!

Jin, Jiyan, Azadî!

Cinîyî do dinya bixelisnê!

Azadîye do ser bikewa!''