Koordînasyonê KJKyî derheqê 25ê Teşrîna Peyêne ya Tekoşînê Vera Şîdetê Serê Cinîyan de ewro beyanatêko nuştekî weşana.

Beyanatê KJKyî wina yo:

"Tarîxê medenîyetanê hîyerarşîyî, tarîxê kolekerdişê cinîyan rastîyêke yo. Bi şîdet, teda, tecawuz û qirkerdişan cinîyî bîyî kole. Cinîya ke bîye kole bîngeya sîstemê hegemonîkî ya. Sîstemê camêrdan ê panc hezar serre seba ke cinîyê nêbê wayîrê vatiş, birre û hêzê îradeyî her hetî ra polîtîkayanê stratejîkan keno. Têgêrayîşê cinîyan ê Rojhelatê Mîyanênî û ê Kurdîstanî vera rejîmê faşîst ê Tirkîya bi xoverdayîşêkê pîl keweno 25ê teşrîna peyêna 2019î. Dewleta Tirke seba ke krîzanê xo yê sîyasîyan ra derbas biba hêrişê kurdan, cinîyan û şaran kena. Hêrişê Rojawanî yê ke hetê Dewleta Tirke ra dabî destpêkerdene hêrişê hegemonîkî yê. Rojawanî de hêrişê cinîyan û sîstemê cinîyan yenê kerdene. Qetilkerdişê Hevrîne Xelef mîsalê nê hêrişan o. No feraseto faşîst wazeno cinîyan bikero kole, tecawuz û îşkenceyê bi cinîyan sey meşrû bido mojnayene.

Tirkîya de vera cinîyan û domanan şîdet, tecawuz û qirkerdişî yenê kerdene. Hêrişê sîstemê hemserekîye kenê. Yeno waştene ke cinîyî sîyasetî ra bêrê dûrvistene û bibê kole.Nê prosesî de cinîyan, domanan, şaran ser o tehlûkeyê pîlî estî. La eke xoverdayîşêko birêxistin bêro kerdene destkewteyî do bibê zêde. Şorişê Rojawanî şorişê cinîyan o. No şoriş îlham dano pêro cinîyanê dinya û komelan. Pawitiş û wayîrvejîyayîşê şorişî yeno meneya pawitişê destkewteyanê cinîyan. Nê esasan ser o ganî ma vera şîdetê serê cinîyan bernameyanê herayan û projeyan awan bikê. Vera teda û zorbazîya sîstemê pederşahîye yê modernîteya kapîtalîste ma ganî bi rayberîya cinîyan komelêkê alternatîf awan bikê. Têgêrayîşê cinîyan ganî bieşko meseleyanê azadîye yê komelî çareser biko. Ma venga pêro cinîyan kenê ke vera sîstemê pederşahîye û faşîzmî xoverdayîşê xo geş bikê û cuya azade ya alternatîfe pîya awan bikê."