Koordînaysonê KJKyî ke vera derheqê hêrişê dewleta tirke yê vera Şingal û Rojawanî eşkerayîye daye û nê pare kerdî:

''Ma şarê êzidîyo ke tarîxî ra heta roja ma tim raştê hêrişanê qirkerdişî yeno û şarê Rojawanî rê serweşîye wazenê û birîndaran şîfa wazenê.

Qirkerdişê Şingalî dewamê qirkerdişanê vera êzidîyan ê. Yeno waştene ke şarê ma yê êzidî tim mîyanê tersî de biciwîyo. Dewleta tirke ya îşxalkera ke qirkerdişo ke pê destê DAÎŞî nêeşka bîyare ca narey waşt pê destê xo temam bikero. Nê hêrişî û pêkerdişê bêehleqê ke vera  êzidîyan yenê kerdene û hêrişê vera Rojawanî  eynî wextî de aktuelkerdişê komployê mîyanneteweyî yê Rayber Apoyî yo. Heme leteyanê Kurdîstanî de hukmatê AKP-MHPyî vera kurdan û şaran hêrişê qirkerdişî rayra beno. Seba ke polîtîkaya xo ya osmanîye bîyare ca hêrişê Şingal, Rojawan û Başûrê Kurdîstanî kena.

Badê hêrişî hema ke şarê êzidîyî hesran keno war, Kazimî vano ke do peymana 9ê teşrîna verêne bêro caardene. No ramojneno ke ê teslîmê hêrişê qirkerdişî yê dewleta tirke bîyî, hemkarê ci yê. Eşkerayo ke pê na peymane dewleta tirke, PDK û Iraq wazenê xopawitiş û xoîdarkerdişê komelê êzidîyan tasfîye bikerê. Hêzanê hamkar-xayînanê ke Şingal nêpawit û verê qirkerdişî akerd ewro zî hêzanê îşxalkeran reyde îtîfaq kenê.

Rojawan hêvîya merdimîye ya. Dewleta tirke pê paştdayîşê Amerîka û Rûsya wazena îradeyê Şorişê Rojawanî bişikno. Amerîka, Rûsya û welatê Ewropa ke amedîye kenê ke Talîbanî sey fermî nas bikerê, waştişê şervananê azadîye yê Şingal û Rojawanî nêvînayîşî ra yenê. Pê DAÎŞî senî ke Rojhilatê Mîyanênî ame serûbinkerdene nika zî pê Talîbanî wazenê parzemînê Asya serûbin bikerê.

Şarê êzidî û Rojawanî semedê xo pawitişî ganî miheqeq xoîdarekerdiş û xopawitişê xo bipawê û aver bêrê. Sey cinîyan û şarî ganî ma xoverdayîşê xo pîlêr bikerê. Ganî statuyê xoserî yê Rojawanî û Şingalî hetê heme hêzanê mîyanneteweyî ra bêro naskerdene. Şarê kurdî ganî her ca de xoverdayîş pîl bikero û wayîrê Rojawan û Şingalî û heme Kurdîstanî  bivejîyo. Reyna şarê Başûrî ganî vera nê hêrişan wirzo payan ser. Semedê rijanayîşê faşîzmî ganî xoverdayîş û têkoşîn bêrê pîlêrkerdene.''