KJKyî bi mesajêkî sere de çalakîya Dusseldorfî pêro çalakîyê gerîlayan, çalakîyê cinîyan û ê şarê kurdî selam kerdî.

Mesajê KJKyî wina yo:

''Ver bi 30ê hezîrana 2022yî gerîlayê ma Zap, Avaşîn, Metîna, Botan û Amed de bi qerardarî xo ver danê û seba welatê xo û azadîya xo sey şehîde Zîlane bi hawayêkê fedayî şer kenê û vera dişmenî benê goga adirî. Gerîlayê ke xeta Zîlane de şinê, bi xobawerîyêka pîle, vera sîstemê qirker û kolonyalîstî şinê û pê tîpanê zerrnênan Kurdîstan de tarîxê merdimîye nusenê. Ma şehîde Zîlane û embazanê xo yê şehîdanê bêmergan bi heskerdiş û rêzdarî yad kenê û soz danê ke ma do sîstemê Îmraliyî birijnê û Kurdîstanê azadî awan bikerê. Seba afernayîşê serkewtişî tek rayîr layîqbîyayîşê nê şehîdan o.

Koyanê Kurdîstanî de şero tewr giran ê tarîxî û seserre yeno kerdene. Gerîlayê Kurdîstanî bi xoverdayîş û şerê xo yê heybetînî herikîyayîşê tarîxî de reçanê neweyan û pîlan verdenê, vîrameyîşê azadîye bi ruhê pîlî yê komunalî gandar kenê û pîl kenê. Gerîlayê Kurdîstanî şerê Zap, Avaşîn û Metîna de, metodê gerîlayan ê seserra 21. bi hawayêkê tewr xurtî vejenê werte. Xeyalê Osmanîyan ê îqtîdarê AKP-MHPyî Zap de vurîyayo kabusêkî û plananê xo yê newekerdişê Lozanî serra 100. de serûbin keno. Gerîlayî serrgêra 50. ya têgêrayîşê ma yê azadîye de bi zerrî, mezg, metod û fedakarîyêka bêhempa polîtîkayanê 100 serran ê kolonyalîst û qirkeran şiknenê. Teyarayê ke dewletê pîlî zî nêeşkenê mengêne vera înan xo ver bidê, gerîlayî bi hêzê xoverdayîşî cewab danê hêrişanê droneyanê çekdaran û hêrişanê kîmyewîyan. Ma sey KJKyî gerîlayanê YJA-Star û HPGyî selam kenê, dîyar kenê ke ma serkewtişanê înan û derbanê înan ê vera dişmenî ra hêzêkê pîlî gênê û ma înan fîraz kenê.

No xoverdayîş û serkewtişo pîl ê gerîlayanê ma, reyna îsbat keno ke pêro polîtîkayanê îşxalî îflas kerdo. Gandarbîyayîşo pîl ê kurdan bi têkoşînê xo resa safhayêka newîye. Vengdayîşê gerîlayan ê seba dişmenî 'Bêrê teslîm bibê' û mesajê înan ê 'Tîya Kurdîstan o, dekewtiş est o la tira vejîyayîş çin o' raştîyêke eşkera kenê û vanê 'Di se serrî yê. Polîtîkayê verênî îflas ê, hînî ganî şima nînan bivurnê.' Ganî hînî hêzê îqtîdarî yê mîyanneteweyî û herêmîyî na raştîye bivînê û bi çinnêhesibnayîşê kurdanê azadan polîtîkayanê xo yê Kurdîstanî newe ra bercnê. Wextê kolonyalîzm, polîtîkayanê qirkerdişî, îxanet û hemkarîye qedîyayo. Stratejîya ma ya kurdanê azadan û cinîya azade û na stratejî de israrê ma pêro polîtîkayê klasîkî derbaz kerdî.

Oyo girîng no yo ke bi şerê westatî û fedayî yê gerîlayanê ma yê cinîyan û şarî, têkoşînê xo yê vera faşîzm û kolonyalîzmî pîl bikerê û dormeyê dişmenî bigêrê. Na safhaya tarîxîye ya krîtîke de têna paştdayîşê gerîlayan nê, pîlkerdişê têkoşînî û balantişê serê serkewtişê gerîlayan zî girîng ê. Bi taybetî ganî ma sey cinîyan hêzêkê têkoşînî, rêxistinkerdeyî û aktîfî aver berê. Pêro waranê Kurdîstanî de çalakîyê bi serkêşîya cinîyan aver şinê û no zî zaf manadar o. Nê esasî ser o ma çalakîyanê şarê xo û cinîyan, bi taybetî rayraşîyayîşê Dusseldorfî selam kenê. Ganî ma bi berdewamî dişmenî bêçare bikerê. Bi nê hawayî ma eşkenê layîqê gerîlayan û şehîdanê bêmergan bibê. Mesajo verên ê şehîdan xoverdayîş û serkewtiş o.

Ma sey KJKyî sere de cinî û ciwanî venga şarê xo, dostanê xo danê ke têkoşînê nikayênî pîl bikerê. Ma veng danê ke seba ke dişmeno ke teng bîyo, nefes zî nêgêro her ca de têkoşînî geş bikerê. No şero ke serkêşîya HPG-YJA-Starî de aver şîyo, serkewtişêkê qetîyî  heq keno, Rayraşîyayîşê Rayberîye yo 50 serre serkewtişî heq keno, têkoşînê cinîyan o rûmetên serkewtişî heq keno. Nê esasî ser o ma xeta serkewtişî ya Rayber Apoyî de, bi xoverdayîşê gerîlayan û bi têkoşînê qerardarî yê cinîyan qetî do ser bikewê.''