KJK: Komelo mîyanneteweyî ganî xoserîya êzidîyan qebul bikero

Koordînasyonê KJKyî serrgêra Fermanê 73. yê 3ê Tebaxa 2014î de tay waştişî ardî ziwan. KJKyî waşt ke xoserîya Şingalî û jenosîdê êzidîyan bişinasîyê.

Koordînasyonê KJKyî serrgêra Fermanê 73. yê 3ê Tebaxa 2014î de pê eşkerayîyêke tay waştişî ardî ziwan. Eşkerayîye wina ya:

''Ma hê dekewenê serra 8. ya Fermanê 73. yê vera êzidîyan. Dejê nê qirkerdişî hema zî teze yo. Ma mesuldaran û kerdoxanê nê qirkerdişî şermezar kenê û soz danê ke pê têkoşînê ci hesabê nê qirkerdişî pers bikerê. Ma şehîdanê fermanî bi rêzdarî yad kenê û soz danê xo vîrameyîşê înan Şingalê Azadî de bo bêrê pawitene.

Tewr zaf cinîyê êzidîyî bîyî mexdûrê wehşetê DAÎŞî. Komelê Êzda de cinîyî qedirgiran ê coka DAÎŞî tewr zaf hêrişê cinîyan kerd. La nê cinîyan ê êzidîyan pê xopawitişî destkewteyê pîlî vistî destî. Cinîyan ê êzidîyan fermanî reyde cinîyê Apogîrî şinasnayî, tecrubeyê înan ra xo rêxistin kerd, pawit û ver bi azadîye kewtî rayîr. Hetê bînî ra înan têkoşînê azadîya cinîyan ê Şorişê Rojawanî ra zî îlham girewt û na hîşmendî û îradeyî ra dima xo rêxistin kerdî. Ewro cinîyê êzidîyî her warê komelî de xo mojnenê ra û temsîlîye kenê.

Ma bi wesîleya serrgêra fermanî reyna wazenê bîyarê ziwan ke:

-Cinîyan ê êzidîyan pê bedelanê pîlan û xoverdayîşî xorêxistinî û xoîdare awan kerdî. Ê hêzê ke nê fermanî ra mesuldar ê herinda ke hesab bidê pê Peymana 9ê Teşrîna Verêne êzidîyan rê bêîradetîye ferz kenê. Şarê ma yê êzidîyan na peymane sey dewamê fermanî dî û cera ci vindert. Eşkera yo ke komelê êzidîyan hînî wayîrê xopawitiş, xorêxistinkerdişî û xoîdarekerdişî yê, sey verî nîyê. Dezgehê mîyanneteweyî, hêzê demokratîkî ganî narey êzidîyan têna meverdê û paştî bidê waştişanê êzidîyan.

-Verê komel û cinîyanê êzidîyan de mesuldarîyê ma estê. Tay welatanê Ewropa Fermano 73. sey jenosîd qebul kerdo. La semedo ke no komel reyna maruzê jenosîdî nêmano wa nê welatî xoîdare, xopawitiş û îradeyê êzidîyan qebul bikerê, paştî bidê ci.

-Dezgeh û komelê mîyanneteweyî ganî xoserîya êzidîyan qebul bikerê û paştî bidê ci.

-3ê Tebaxe wa sey Jenosîdê Êzidîyan bêro qebulkerdene.

-Sere de têgêrayîş û rêxistinê cinîyan ganî pêr hêzê awerwaz û demokratîkî semedo ke cinîyê esîrî yê êzidîyî bixelisê, birînanê xo ra bibê weş paştî bidê nê cinîyan.

-Êzidîyî ganî abigêrê Şingalî, dişmenanê xo Şingalî ra pakî bikerê û îdareyê xo de cabigêrê.

-Bi taybetî cinîyî ganî kultur, bawerîya xo bipawê, xorêxistinîya xo bîyarê ca, xebatanê înşa aver berê.''