Koordînasyonê KJK’yî derheqê 1’ê Êlule Roja Haştîye ya Dinya de eşkerayîyêk daye û nê pare kerdî:

''Roja ma de 1’ê Êlule Roja Haştîye ya Dinya vera şeran, rijnayîşan, bêadaletîye, faşîzmî sîstemê camêrd-dewlete sey roja mucadeleyî yena fîrazkerdene. Ewro şerê dinya bi metodanê bînan yeno domnayene. Şerê dinya yê 3’ine bi sebebê averşîyayîşê teknîkî hîna bitehluke û kritîk o. Teknîk hîna zaf semedê rijnayîşî yeno şuxulnayene. Coka nika mucadeleyê azadîye rayraberdiş heme çaxan ra hîna muhîm o. Merdimîye tim mîyanê kaos û krîz de yena tepiştene û serdestan rê bena qurban. Qirkerdişê cinîyan rîyê modernîyetê kapîtalîstî ra zêdîyenê û biyî sîstematîk. Mucadeleyê Azadîye yê Kurdistanî yê ma hemen wextî de mucadeleyê haştîye yê semedê Rojakewtena Mîyanêne û Dinya yo.  Heta ke qetilkerdiş cinîyan nêro vindarnayene haştîye çi rey nêresena.  Heta ke estbîyayîşê Kurdan û heme şaranê bînan  û îtîqatan ê ke çîn hesibyenê, nêro qebûlkerdene haştîye nîna. Semedê naye zî ganî cinî, şar û heme bindestî yew bî û mucadeleyê hemparî gird bikerê.

Îqtîdarê AKP-MHP’yî Dişmenê Haştîye yo

Gama ke ma kewtenê 1’ê Êlule Roja Haştîye ya Dinya de verê çimanê heme dinya de îqtîdaro faşîst ê AKP-MHP’yî şaredarîyê Amed, Wan û Mêrdînî xesp kerdî. Îtîfaqo faşîstî bi nê caardişî reyna ranojna ke ê dişmenê haştîye yê, dimenê cimat û cinîyan ê. Pêrodayîşê ma  cinîyan vera nê faşîstan o. Mudaceleyê cinîyan do haştîye bîyaro Rojakewtena Mîyanêne. Ma 1’ê Êlule Roja Haştîye ya Dinya vera faşîzmî, serdestîya camêrdî, qirkerdişê cinîyan û qetilkerdişê xoza  bi ruhê xoverdayîşî pêşwazî kenê, ma bi heme hêzê xo şirê serê faşîzmî û birijnê. Peynîya Îqtîdarê AKP’yî nêzdî ya.Goş xebaranê zûran ê  medyaya şerî ya taybete medenê, ê demêko zehmet ra ravênê û do bin bikewê. Rayîrê vergirewtişê şeran û ardişê haştîye mucadeleyê hemparî yê hêzanê demokrasî û azadîye ra ravêreno. Na çarçewe de ganî 1’ê Êlule Roja Haştîye ya Dinya heme rojan de mucadele bêro girdkerdene û sey roja estbîyayîş û îradeyê xo ramojnayîş bêro fîrazkerdene.‘‘