Koordînasyonê KJKyî bi wesîleya 25ê Teşrîna Peyêne Roja Têkoşînê Vera Şîdetê Serê Cinîyan û 27ê Teşrîna Peyêne serrgêra ronîyayîşê PKKyî eşkerayîyêke daye. Eşkerayîye wina ya:

''Ma nê erfatê 25ê Teşrîna Peyêne de sere de Wayanê Mirabalan pêro cinîyan ê têkoşêran selam kenê. Ma reyna visnenê vîrî ke ganî ma pê sloganê jin, jiyan, azadî wayîrê erjanê cinîyan ê têkoşeran vejîyê. Ma bi na hişmendîye venga pêro cinîyan danê ke bêrê waranê têkoşînî.

Ma kewtê hewteyê fîrazkerdişê serrgêra 44. ya partîya ma PKKyî ya ke bi ruhê azadîye yê şarê kurdî, cinîyan, şar û bawerîyanê cîyayan reyde verê xoverdayîşî akerd û bi estbîyayîş û têkoşînî hêvî ganî kerde. Nê rojan de ke ma do bikewê serran 45. ya partîye, têkoşînê bi serkêşîya PKKyî ganîbîyayîşê şarê kurdî geş kerd, erjê kurdan, cinîyan û merdimatîye zêdînayî û rayîrê cuyêka rûmetêne akerd. Bi na wesîle ma serrgêra ronîbîyayîşê partîya ma PKK ya ke roja gandarbîyayîşî ya, sere de Rayberê xo, tepişteyanê azadîye, şarê kurdî, cinîyan ê xoverdayoxan, ciwananê xoverdayoxan û merdimatîye rê fîraz kenê.

Ma xoverdayîşê gerîlayan ê yo ke herêmanê Avaşîn, Metîna û Zapî de erjê pîlî tarîxê azadîya şarê kurdî de zêdînayê, şerê estbîyayîş û azadîye kenê, selam kenê. Ma serrgêra 45. ya PKKyî ya fermandar û şerwananê HGP-YJA STARî fîraz kenê ke vera teknîkê dişmenî, çekanê qedexe û kîmyewîyan bi îradeyêkê pîlî xo ver danê.

Ma ronîyayîşê PKKyo ke partîya şehîdan a, keyeyanê şehîdan rê fîraz kenê. Ma şexsê Sakîne Cansiza ke ronîyayîşê PKKyî de cinîyanê verênan ra yew bîye, de pêro şehîdanê Kurdîstanî rê fîraz kenê. Seba teqîbê rayîrê raştîye û servistişê têkoşînê Mazlûm Dogan, Kemal Pîr, Hakî Karer, Hayrî Durmuş, Zîlan, Delal Nûrhak, Bêrîvan Zîlan, Delal Amed, Nagîhan Akarsel, Baz Mordem, Sara û Rûkenan ma sozê xo dibare kenê.

Rayberîya ma dewrêkê faşîzmî de, bi biranê tarîxîyan, rixmê şertanê dewrî û barbarîya dişmenî gamê destpêkî yê têkoşînê azadîye eştî û 45 serrî verî verê xo da ronîyayîşê PKKyî. PKKyî û têgêrayîşê azadîye bi têkoşînê raştîya Rayberîye, bi sloganê 'jin, jiyan, azadî'  berdewamî viste xo destî, têgêrayîşê cinîyan eşkîya bibo têgêrayîşêkê dinya, şaran û bindestan. Rayberîya ma bi ked û xîretêkê pîlî paştîya xo daya şarê kurdî û no şar gandar kerd.  Rayberîye kesayetê cinîya azade, cinîya wayîrîrade, têkoşer û fedakare afernaye. Nê warî de PKK heman wext de yeno manaya têkoşînê cinîyan ê xobîyayîşî. Seke Rayberîye vatbi 'PKK partîya cinîyan a' na raştîye bi baldarî îsbat bena.

Nê dewrî de ke ma şahidîya xoverdayîşanê cinîyan kenê faşîzm bêmabên hêrişê cinîyan keno. Şarê kurdî û cinîyê kurdî, bawerî û şarê cîyayî, kultur û ziwanê cîyayî binê hêrişanê çetinan ê faşîzmî de ciwîyenê. Şîdet û faşîzmê vera cinîyan bi taybetî waranê leşkerî de yê. Şero taybet şexsê cinîyan de wazeno komelî çin bikero. Rixmê ney zî seserra 21. do biba seserra têkoşîn, xoverdayîş û serewedaritişê cinîyan. Cinîyê kurdî do serkêşîya têkoşînê cinîyan ê seserra 21. bikerê. Coka ganî sere de cinîyê kurdî cinîyê dinya seba nê têkoşînî amade bibê. Bi taybetî ganî her ca de têkoşînê afernayîşî, xurtkerdiş û pawitişê cinîyan û cuye her warê cuye de bêrê kerdene.

Camêrdê serdestî, hêzê dînî û îdeolojîya dewlete nêverdanê ke cinîyî sey unsurêkê komelî biciwîyê. Vera cinîyan îstîsmar, dej, kiştiş, teda, bêhêvîtî, bêhêzbîyayîşî yenê ferzkerdene. Cinîyê xoverdayox, têkoşer, azadîgîr û cigêrayoxê heqî sey dişmenê sîstemî pênase benê û înan rê kişîyayîş yeno ferzkerdene. Ma ganî vera nê ferzkerdişan xebatanê xorêxistinkerdişî xurt bikerê. Vera hişmendî û polîtîkayanê serdestîya camêrdan averberdişê hişmendîya xopawitişî girîngîyêka krîtîk a. Bi taybetî zaf girîng o ke komel de vengîyêke nêra verdayene ke hişmendîya serdestîya camêrdan xo nêkewa tede. Ganî ma hêrişanê çetinan ê serdestîya camêrdan ê vera her cinîye sey hêrişê vera komelî biercnê û bi hişmendîya xopawitişî rêxistinîya xo bikerê. Seba ke meseleyê ke ma mîyanê komelî de, bi taybetî zî sey cinîyan vînenê, bi krîz û kaosê dinya hîna zêdîyenê ganî ma vera nînan têkoşînê xo rê dewam bikerê. Ganî hol bêro famkerdene ke şîdetî ça ra û senî derbazê cuya ma beno û reseno heta kamcayê waranê cuye.

 Ewro şerê pîlî yê azadîye û têkoşînê rûmetî de cinîyê kurdî serkêşîye kenê. Cinîyê kurdî waranê leşkerî, sîyasî û komelî de alaya cuya azade û xoverdayîşî berz kenê. Îdeolojîya Rayberîye û têkoşînê azadîya cinîyan kesayetê cinîya ke domanan weye kena, ewnîyena karanê keyeyî ra û xizmetê camêrdan kena, kişenê. Herinda ci de zî cinîya ke sîyaset kena, asayîşî pawena, îradeyê xo visnena destî, îdareyê xo kena û seba cuya azade têkoşîn kena afernenê. Ganî cinîyî vera serdestîya camêrdan, îqtîdar, dîn û pederşahîye bi averberdişê sîstemê xopawitişî, îradeyê caardişê estbîyayîşê xo yê azadî bimojnê.

Nê prosesî de azadbîyayîşê cinîyan bi têkoşînê xopawitişî beno. Vera şîdet, bêedaletî, talankerdiş, wêrankerdiş, astengkerdişê azadîyan û înkarkerdişê înan ganî xebatê xopaewitişî bibê xebatê serekeyî. Rejîmê AKP-MHPyî xîret keno ke pê metodanê şerê taybetî komelî biqedîno. Ganî goreyê neu çalakîyî bêrê kerdene, pêro dormeyanê demokratîk, komanê azadîgîran û kurdan de babete ser o nîqaşî bêrê kerdene û komel vera nê kayan wurzo we. Vera polîtîkayanê AKP-MHPyî xoverdayîş, şerkerdiş, teşhîrkerdiş çalakîya tewr lazim a. Seba ney zî ganî xopawitiş bêro geşkerdene. Ma sey şar û cinîyan ê kurdan nê warî de wayîrê îmtîhan û tecrubeyan ê. Ma sey şaranê biîradeyan bi nînan sînordar nêmanê û îdîaya afernayîşê komelêkê hişmendî bikerê, bi xopawitişî bawer bibê.

Rejîmê serdestî wayîrê îqtîdarê camêrdan ê. Şerê nikayênî, şerê aqlê camêrdan ê. Cinîyî vera nînan ganî xo û komelî perwrde bikerê û hişyar bikerê. Bi taybetî ganî komel derheqê babetanê 'şer berhemê aqlê camêrdan o', 'şîdet hîsanê merdimatîye de çin û merdim senî şer û şîdetî vîneno' hişyar bibê. No zî ganî çarçewa pawitişê komelî û cinîye de bêro kerdene.

Nê prosesî de her xebate, rêxistinkerdiş, perwerde û xebatê sey nînan ganî serê esasê hişmendîya xopawitişî û bi ferasetê rêxistinkerdişê şerê şarî yê şorişgêrî bibê. Cinîyan ê kurdan rixmê hende hêriş û tedayan zî raştîyêka muazeme ya têkoşînî afernaye. Serewedaritişo serkêşîya cinîyanê Rojhelatê Kurdîstanî û Îranî de aver şîyo, ewro mîsalê eşkerayî, bitesîr û ganî yê şerê şarî yê şorişgêrî û xopawitişî yê. No serewedaritiş di mengî yo dewam keno û sey roja verêne gandar o. Dewlet û rejîmanê faşîst, îqtîdaran sayê nê serewedaritişî ra fam kerd ke ê do bi rehetî nêzdîyê cuya cinîyan nêbê. Serewedaritişê cinîyanê Rojhelatê Kurdîstanî û Îranî yeno manaya şerê şarî û xopawitişî. Ganî no metodê serewedaritişê cinîyan tim est bo. No sey vera qirkerdişê cinîyan, hêrişanê vera komelî û vera talanê xoza sey mîsalê têkoşînê şerê şarî xopawitişî bêro dîyene. Coka erkê ma yo ke ma serewedaritişê cinîyanê Rojhelatê Kurdîstanî rêxistin û sîyasî bikerê.

Ma 25ê Teşrîna Peyêne emser bi wayîrvejîyayîşêkê xurtêrî pêşwazî bikerê. Ganî dinya serkêşîya cinîyan de ver her tewirê şîdetî wurze we û tewirê xo bimojna. Bi nê hewayî ma veng danê ke 25ê Teşrîna Peyêne emser bi hîs û atmosferê serewedaritişanê cinîyanê Rojhelatê Kurdîstanî û Îranî pêşwazî bikerê. venga cinîyan danê ke her cayê dinya de bi sloganê 'jin, jiyan, azadî' biherikîyê waran, dest bidê destî û seba binvistişê faşîzm, îşkence, tecrîd û qirkerdişî têkoşîn bikerê.''