Komîteya Têkilî û Îtîfaqanê Demokratîkan a KJKyî meseleya Afganîstanî ser o eşkerayîyêke daye. Eşkerayîye wina ya:

''Afganîstan de netîceya polîtîkayanê gemarinan ê hêzanê hegemonîkan de îqtîdar dişmenê cinîyan Talîbanî rê ame teslîmkerdene. Na rewşe afganîstan de û pêro dinya de bîye sebebê hêrsî û reyna raştîyêke eşkera kerde: Hêzê xo ra ber, rêxistinîya xo ra ber û pawitişê xo ra ber ma nêeşkenê pê qet yew hêzî bawer bikerê.

Nê hêzanê ke Afganîstan teslîmê Talîbanî kerd Efrîn, Serêkanîyê û Girê Sipî zî teslîmê dewleta tirke  kerd. Xora Erdoganî îtîraf kerd ke hişmendîya înan û yê Talîbanî seyci yê. Cara na çarçewe de Meydanê Teyarayan ê Kabilî dîya binê kontrolê dewleta tirke. Na game sey rêxistinkerdişê cerganê Erdoganî yo û vera pêro şaran gefêko pîl o.

Ewro Afganîstan de cinîyî qirkerdişî reyde têrî yê. Ma sey şarê kurdî û cinîyan ê kurdan hol zanenê ke tek rayîrê pawitişê estbîyayîşî û îradeyî rêxistinbîyayîş o. Ma sey şar û têgêrayîşî na raştîya bi hawayêkê dejînî tecrube kerde û hema zî kkenê. Komployê vera Rayberîya ma mîsalo tewr gandar ê ney o. Îşxalê Şingal û Kobanê, hêrişanê DAÎŞî yê vera Rojawan û Başûrî ra bigêrê heta nika ma qirkerdişî reyde têrî yê.

Nê serebûtê ke nika Afganîstan de qewimîyenê rîyê raştikênî  yê welatanê rojawanî (Ewropa) zî eşkera kenê. Eşkera bi ke erjê sey heqanê cinîyan, azadîye û demokrasî seba hêzanê NATOyî têna semedê polîtîkayanê înan ê gemarinan çekêk a. Êyê ke 20 serrî verî pê heqanê cinîyan xîret kerd ke îşxalê xo meşrû bikerê, cuya bi mîlyonan cinîyan teslîmê Talîbanî kerd.

Wextê rejîmê Talîbanî de tewr zaf cinîyî semedê azadîye, demokrasî û cuya azade tewrê xoverdayîşî bîyî. Înan rixmê şertanê giranan rayîrê rêxistinbîyayîşî peyda kerd. Cuya azade û sîstemo demokratîk do Kurdîstanî ra heta Afganîstanî rayberîya cinîyan de do bêrê awankerdene. Ma sey cinîyanê Kurdîstanî sey vizêr ewro zî hetê cinîyanê Afganîstanî şaranê ci de yê. Ma venga pêro cinîyanê dinya danê ke paştî bidê wayanê xo yê afganan, cengê xo seba înan vejê û cuye, destkewte û xeyalanê înan bipawê. Vera hezanê pederşahîyan-dişmenê cinîyan ma îtîfaqê xo yê cinîyan berz bikerê!''