Koordînasyonê KJKyî derheqê Deîze Poyraza ke hêrişê vera HDPyî de Îzmîr de ameye qetilkerdene de eşkerayîye daye.

Eşkerayîya KJKyî wina ya:

''Ma sere de keyeyê erjayeyî yê Denîze Poyraza ke hetê çeteyêkê dewlete ra ameye qetilkedene û şarê xo rê serweşîye wazenê. Ma do sey cinîyan ê kurdan semedê Denîze Poyraz têkoşînî pîlêr bikerê. Şarê ma mîyanê şaranê dinya de cayê xo yê bianorî  ke heq keno,  do bifîno dest.

Tirkîya tarîxê xo de dewro tewr hesas û krîtîkî ciwîyeno. Caardişê şefanê faşîstan Erdogan û Bahçelî yê zere û teberê welatî, komelê Tirîya fînayo mîyanê krîzê pîlî. No îqtîdaro faşîsto ke sond wendo ke o vera kurdan qirkerdiş bikero têna dişmenê kurdan û komelê tirkanî rê zî dişmenîye keno.

Hukmato faşîst ê AKPyî sîstemê dizdîye, zurîye, xesp, destserneyaş, talan, şîdet û tecawuzî aferna. Tirkîya helisîyena. Komelê Tirkîya krîzê ekonîmîkî û sîyasîyî ciwîyeno. Dewleta tirke heme îmkananê xo vera kurdan xerc kena. Rixmo ke ê pê heme hêzê xo yenê kurdan ser kurdî senî ke heme dinya zî vîna her ca de raştê xoverdayîşê kurdan yenê. Coka waştişê înan û qirkerdişî nêame ca. Deweleta tirke bi temamî dewlete ra vejîyaya. Dewleta tirke hînî serkêşîya mafya-çeteyan de dewletêka terorî ya. Îqtîdar dewrê xo yo tewr pîl ê vînîkerdişî ciwîyeno. Coka pê hêrişî wazeno payra bimanê.

No îqtîdaro faşîsto ke rewna emrê xo kerdo de wazeno pê provokasyon û qirkrdişan newe ra îqtîdarê xo rono. Hêrişê vera banê HDPyî yê Îzmîrî zî leteyêkê nayî yo. Kiştoxê ke Heleb û Minbic de vera kurdan şer kerd sey wezîfekarê dewlete yo perwerdekerdeyî no hêriş kerd. No hêrişêko plankerde yo.  Xora nêzdîbîyayîşê wezîfedaranê dewlete yê vera kiştoxî ra zî na rewşe yena fehmkerdene. Hêrişê vera banê HDPyî yê Îzmîrî teseduf nêyo. Seba ke uca kombîyayîş amebi organîzekerdene û qirkerdişo komkî ameyo hazirkerdene. Îqtîdaro faşîst û dewleta xorîye peyê provokasyonan û qirkerdişanê neweyan de yê.

Ma sey cinîyan ê kurdan tim vernîya têkoşînê azadîye bi ruhê fedayîyî ca girewt. Wextanê tewr zehmetan de zî ma pê cesaretê pîlî wayîrê xebatan vejîyayî. Semedê cuyeyêka azad û newîye vera camerîya serdestîye û dewlete ma veng û rengê azadîye yê cinîyan û şarê ma temsîl kerd. Na çarçewe de ma bedelê pîlî dayî. Sanîke Cansiz, Sevê, Fama, Leyla Agirî û Xemrîn Xelefî nimûneyê nayî yê. Embaza Denîze Poyraz mîyanê nê têkoşînî de bîya pîl. Cinîyê kurdî rîyê waştişê azadîye ra hedef yenê girewtene. Senî ke tewirê dayîka Denîze Poyraz de zî yeno vînayene şarê kurdî û cinîyê kurdan çirey do nêrijîye û peyser geme meerzê. Ma tewirê keyeyê Denîze Poyraz û şarê selam kenê.

Pê nê qirkerdişê têna şarê kurdî nê heme muxalefetê Tirkîya yeno hedefkerdene. Coka ganî vera îqtîdarê faşîstî muxalefet pîya têbigêro. Eke wina mebo têna kurdî nê şarê Tirkîya zî do dejê nayî biancê. Nê semedî ra ganî heme şarê Tirkîya, îtîqatî, cinî, ciwan, kedkar, hêzê ke azadîye û demokrasîyî wazenê, pêro pîya têkoşîno hempar bikerê. Ganî îqtîdarê AKP-MHPyî bêro wardayene. Ganî heme hêzê muxalîfî vera faşîzmî pîya têkoşîn bikerê. Îqtîdaro dewrê xo yê tewr zehîfî de yo. Têkoşîno hempar do peynîya ci bîyaro.''