Koordînasyonê KJKyî bi wesîleya serrgêra 2. ya Hemleya 'Vera qirkerdişê cinîyan wext wextê pawitişê cinî û komelê azadî yo' eşkerayîyêke weşanaye.

Eşkerayîye wina ya:

''Hemleyanê KCK û KJKyî serrêka xo kerde de. Hemleya ma bi sloganê 'Vera tecrîd, faşîzm û îşxalî wext wextê caardişê azadîye yo' semedê wedarnayîşê tecrîdê vera Rayberîye û caardişê azadîya Rayberîye têkoşînêko xurt vet werte. Semedê vindarnayîşê hêrişanê îşxalî yê vera pêro Kurdîstanî serkewtişêko pîl ver werte. Ney reyde şarê ma têkoşînê azadîya cinîyan de rolêko tarîxî ard ca. Mabênê şarê kurdî û şaranê Rojhelatê Mîyanênî de yewîyêke viraşte. Bi sebeb ke fikrê Rayber Apoyî zêdêr bêrê vilakerdene. Mîyanê şaranê dinya de eleqe û sempatîya semedê Rayberîya ma û têgêrayîşê virazîyayî.

Hemleya bi nameyê 'Vera qirkerdişê cinîyan wext wextê pawitişê cinî û komelê azadî yo' yo ke ma 22ê êlula 2020î de dabî destpêkerdene semedo ke seserra 21 biba seserra cinîyan û meseleyanê cinîyan kerde rojdem. Qirkerdişo cinsî yê vera cinîyan yeno manaya qirkerdişo komelkî û ekolojîk zî. Tarîx de şîdet, teda, pêkewtiş, zûr û kolonyalîzm verî ra hetê camêrdan ra vera cinîyan ameyî kerdene. Hemleya ma ya cinîyan pê kede û xîretêkê pîlî ameya îdarekerdene. Nê esasî ser o ma pêro cinîyan, şaran, hêzanê demokrasî yê ke tewtê hemleyanê KCK û KJKyî bîyî zerrî û canî ra selam kenê. Hemleya ma de koyanê Kurdîstanî de şerwan û rayberê ercîyayeyî şehîd bîyî. Serkewtişê na hemle de kede, xoverdayîş û tewirê azadîye yê şehîdanê ma dîyarker bîyî.

Ma sey têgêrayîşê cinîyan ê kurdan xebatanê îdeolojîk, sîyasî, komelkîyan û xopawitişî de warê geşkerdiş û îdarekerdişê pêro xebatan de wayîrê qerardarî û îradeyî yê. Ma mesuldarê geşkerdiş û plansazîya têkoşînî yê. Ma prosesê hemle de nika ra pey  zî bi nê hawayî nêzdîbîyayîşêk bimojnê.

Prosesê hemle de ma bi çalakîyan rewşa Rayberîye, pratîzekerdişê îdeolojî û felsefeya ey, xebatê xo kerdî rojdem. No zaf girîng bi. Çunke sîstemê modernîteya kapîtalîste pê ters û qesawetêkê pîlî wazeno Rayberîya ma zî vîrê merdimîye ra dûrî bifîno. La Rayberîya ma semedê şaranê Rojhelatê Mîyanênî û şaranê dinya bîya rayberîyêka kuresele.

Eke ewro îqtîdarê AKP-MHPyî qels bîyo, no pê saya têkoşînê Rayberîye, cinîyan, gerîlayan, şaran û hêzanê demokrasî yo. Tirkîya de hêzo esas o muxalîf HDP û HDK zî tede hêzê demokrasî, femînîstî û têgêrayîşê cinîyan ê.

Dewleta tirke nê prosesî de hêrişê vera Kurdîstanî zêdînayî. Armancê ci yo sereke zî qedînayîşê têkoşînê şaran o. HPG û YJA-Star semedê azadîya merdimîye û agfernayîşê cuya azade şerêkê pîlî danê. Xoverdayîşê Avaşîn, Zap û Metîna de hêzê ma YJA-Starî Herêmanê Pawitişî yê Medya de rayberîya xoverdayîş û fedayîtîye kenê. YJA-Starî asta fedayîtî de temsîlîya modernîzmî û bawerîya cinîyan kerde, pêro cinîyanê dinya, şaran û merdimîye rê bîyo çimeyêkê xurtî yê moral û bawerîye.

Vakurê Kurdîstanî û Tirkîya de rayberîya cinîyan û ciwanan de astêka xurte ya xoverdayîşî vejîyaye werte. Çalakîyanê 8ê Adare û 21ê Adare de cinîyî pê çerî û qerardarî tewrê hemle bîyî. Tarîtî û bêvengîya faşîzmî ameyî parçekerdene. Dadîyanê kurdan vera îşkenceyê dewleta tirke pêro erjê azadîye, nasnameyê Kurdîstanî û heqê şehîd û tepişteyan pawitî. Dewleta tirke Vakurê Kurdîstanî û Tirkîya de destkewteyê cinîyan destser kerdî, dezgehê cinîyan qefilnayî, Peymana Îstanbulî wedarnaye, sîstemê hemserekîye wedarna, şîdetê vera cinîyan zêdîna. Dadîyê 70 serrî zî tede cinîyê sîyasetmedarî, îdarekarê meclîsanê cinîyan tepişîyayî, tewr peyên zî cinîyê rayberî yê sey Ayşe Gokkan û Leyla Guven tepişîyayî. Vera tepişteyanê PKK û PAJKî bi her metodî îşkence ame kerdene. Vera nê tedayan zîndanan de grevê vêşanîye ame kerdene. Ma na çalakîya milîtananê PKK û PAJKî selam û fîraz kenê. Waştişo verên ê grevê vêşanîye wedarnayîşê tecrîdê vera Rayberîye bi. Tepişteyanê PKK û pAJKî na çalakîya xo qedînaye û ê do têkoşînê xo pê metodanê cîya-cîyayan dewam bikerê.

Rojawan de semedê wedarnayîşê tecrîdê vera Rayberîye, vera hêrişanê îşxalî yê Tirkîya û qirkerdişê cinîyan çalakîyê girseyî ameyî kerdene. Şorişê Rojawanî şorişêkê cinîyan o. Şexsê embaze Şehîde Sosine Bîrhat de reyna qerardarîya YPJyî ya semedê pawitişê welatî ameye mojnayene. Cinîyan her warê komelkî de beşdarîyêka pîle arde ca. Rayberîya cinîyan de rêxistinîya neteweya demokratîke û awankerdişî do bêra kerdene. Sûrîye de rayberîya cinîyan ê kurdan, ereban, armenîyan, asûrîyan, tirkmenan û çerkezan de modelê neteweya demokratîke do bêro viraştene.

Meclîsê Cinîyan ê Êzidîyan ê Şingalî semedê vilakerdişê fikranê Rayberîye û semedê wedarnayîşê Peymana serê Şingalî ya 9ê Teşrîna Verêne ya 2020î têkoşîn kerd. Semedê pawitişê xoserîya Şingalî, rêxistinîya ci û vera hêrişanê Tirkîya çalakîyan de ca girewt.

Rojhelatê Kurdîstanî de zî tewr zaf cinîyan vera rejîmê Îranî têkoşîn kerd. Îranî sere de Zeynepe Celalîyan xeylêk cinîyê çalakîkerî eştî zîndanî û polîtîkaya xo ya dişmenîya vera cinîyan dewam kerd.

Yeno waştene ke cinîyê Başûrî bigêrîyê binê kontrolê hêzanê herême. Xeylêk dezgehanê cinîyan de camêrdî benê îdarekar. Destûr nêdîyeno ke cinîyî rêxistinîya xo ya xosere awan bikerê. Başûr de krîzê ekonomîk û komelkî astêka girînge de yê. Şîdetê vera cinîyan, xokiştiş hema zî dewam kenê. Cinîyê Başûrî ney qebul nêkenê û xo ver danê. Hem hetê cinîyan ra û hem zî hetê şarî ra tewr zaf no parçeyê ma yewîya neteweyî wazeno. Cinîyê Başûrî îşxalê Tirkîya zî qebul nêkenê.

Hemleya cinîyan a bi nameyê 'Semedê muhakemerdişê dîktatorî se sebebî' têna Ewropa de nê Kurdîstan, Rojhelatê Mîyanênî û Ewropa de rojdemêko girîng awan kerd. Na hemke xeylêk serkewte bîye. Meclîsê cinîyan ê Ewropa hertim Îmrali û şerê Kurdîstanî kenê rojdem. Xebatanê cinîyanê Ewropa barêka girane ya têkoşînî girewte û rolêko girîng kay kerd. Nê prosesî de komîsyonê cinîyan ê KNKyî semedê caardişê yewîya neteweyî yê şarê kurdî û cinîyan xebat û pêvînayîşê girîngî kerdî. Nê cinîyî do yewîya neteweyî ya cinîyan awan bikerê.

Ma xoverdayîşêko pîl kerd la hema zî Rayberîya ma binê  tecrîdî de, Kurdîstan zî binê îşxalî de yê. Meseleyê azadîya cinîyan hema zî giranîya xo pawenê. Coka ganî ma têkoşînê xo geş bikerê û serkewtişî xorin bikerê. Pê geşkerdişê têkoşînî ma do azadîya Rayberîye bîyarê ca û fikranê ey her cayê Kurdîstanî ra vila bikerê.

Ma sey KJKyî Hemleya 'Vera qirkerdişê cinîyan wext wextê pawitişê cinî û komelê azadî yo' rê dewam bikerê. Plansazîyê ma do pê tecrubeyanê parî bêrê geşkerdene.

Rojdemê ma yo verên wedarnayîşê tecrîdê vera Rayberîye yo. Ma azadîya Rayberîya xo sey azadîya cinîyan û azadîya Kurdîstanî vînenê. Heta ke meseleyê cinîyan çareser nêbê do çareserîyêka raştikêne nêra caardene. Çareserîya dewaya kurdan pê çareserkerdişê meseleyanê cinîyan û awankerdişê cuya alternatîfe do bêra caardene.

Safhaya diyîne ya hemle de armancê ma azadkerdişê Rayberîye, qedînayîşê îşxalê Tirkîya, çinkerdişê îqtîdarê AKP-MHPyî yê. Armancê ma yo esas çinkerdişê îtîfaqê gemarinî yê Erdogan-Bahçelîyî yo. Ma pê hemleyanê xo deşt, koy, dew, şaristananê xo azad bikerê. Nê esasî ser o îdeolojîya Rayberîya ma, semedê pratîzekerdişê xeta azadîya cinîyan ma do emser zî xebatanê hemle geşêr bikerê. Ma do derba peyêne bidê rejîmê faşîstî yê Erdogan û Bahçelî û xoverdayîşî pê azadîye tacîdar bikerê.

Vera qirkerdişê cinîyan wext wextê pawitişê cinî û komelê azadî yo. Semedê afernayîşê wextanê azadîye ma veng danê ke tewrê cepheyanê xoverdayîşî bibê.''