KJKyî bi wesîleya serrgêra 45. ya ronîyayîşê PKKyî mesajêk weşana. Mesajê PKKyî wina yo:

''Ma serrgêra ronîyayîşê PKKyî sere de Rayber Apoyî rê, şexsê embaz Hakî Karer û embaze Sara de pêro şehîdan rê, şarê ma rê, dostanê ma rê û pêro cinîyan rê fîraz kenê. Ma verê pêro şehîdanê xo de bi mînet û rêzî sereyê xo anê war. Ma soz danê ke bi ruhê fedayî û terzê PKKyî şorişê xo biresnê serkewtişî.

Wexto ke dewletanê kolonyalîstan de Kurdîstan de hêvîya ciwîyayîşî nêverdabî, şarê kurdî kerdbî gorî PKK ronîya. Coka PKK partîya azadî û hêvî ya. PKKyo ke Rayber Apoyî sey 'rojbîyayîşê min ê diyînî' terîf kerdbî, ronîyayîşê ci rojbîyayîşê pêro kesanê rûmetênan û azadîgîran o. Ewro partîya ma bîye hêvîya şaranê dinya. Coka her cayê dinya de sloganê 'PKK şar o, şar tîya de yo' fekê her kesî de yo.

Teyna Kurdîstan de ney cayanê bînan de zî cinîyî bi hawayêkê fîzîkîyî partîyanê bînan de asayêne û şorişgêran tim meseleyê cinîyan taloq kerdêne. Rayber Apo pê hesîya ke cinîyî statuyê diyînî de yê coka mîyanê PKKyî de cinîyan rê warêko azad û têkoşînkerdişî viraşt. Bi nê hawayî PKKyî meseleya cinîyan kerde rojdemê xo yo verên. Bi têkoşînê embaza ma Sakîne Cansiz no têkoşîn dîya destpêkerdene û bi ercnayîşê 'PKK partîya cinîyan a' yê Rayber Apoyî resa hêz û manayêka pîle. Cinîyan ê kurdan bi PKKyî xo şinasna, hem têkoşînê azadîya neteweyîye hem zî têkoşînê têdûştîya cînsîyetan kerd û ewro ê pêro cinîyanê dinya rê bîyî nimûne.

Dewleta tirke ya faşîste-kolonyalîste her serre îdîa kena ke partîya ma qedînaya la eqsê ney partîya ma bîye globale û kok da. Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' ya ke emser hetê dostanê ma ra dîyaya destpêkerdene, îsbata ney a.

Ewro Rayber Apo Îmrali de bi bawerî û hêvîya PKKyî mîyanê xoverdayîşêkê bêhempayî de yo. Gerîlayê ma zî xeta Rayber Apoyî de û rêçê şehîdanê ma de mîyanê xoverdayîşêkê pîlî de yê. Ma zî sey cinîyan bi nê tecrubeyan û qerardarî têkoşînê xo do berê serkewtişî û paradîgmaya ekolojîke, demokratîke û azadîgîra cinîyan awan bikerê. PKK keweno serra 46ine, nê prosesî de ma her wextî ra zafêr qerardar ê ke azadîya Rayberîye bîyarê ca, bi şiknayîşê hêrişanê qirkerdişî Kurdîstanê Azadî awan bikerê û Kurdîstan de cuy azade û cinîya azade aver berê.

Ma ancî serrgêra 45. ya ronîyayîşê partîya xo fîraz kenê. Ma venga pêro cinîyan, ciwanan, şarê kurdî û dostanê ma danê ke cuya edîle û demokratîke hîna bi hêzî awan bikerê, tewrê PKKyî bibê, wayîrê erjanê merdimatîye bibê û nînan aver berê.''