Koordînasyonê KJK’yî derheqê serrgêra çalakîya fedaîye ya Zeynep Kinaciya (Zîlane) ke Dêrsim de viraştebî eşkerayîyêka nûştekîye weşanaye û vat, “Tarîxê cinî bi fikir, kede, fedakarî û cesaretêkê pîlî yeno nûştene.”

 Eşkerayîye de ame vatene, “Sîstemo serdest ê camêrdî bi înkarkerdişê kede û tarîxê cinî, a sey çinê ramota. Tarîxo fermî tarîxê çinêhesebnayîşê cinî yo. Têgêrayîşê cinî yo azad bi serkêşîya Rayber Apoyî Sakîne Cansize ra dest pêkerd, bi Zîlanan dewam kerd û hewna zî dewam keno. No tarîxê estbîyayîşê cinî yo. Tarîxê estbîyayîşê cinî ya ke çinê yena hesabnayene yo.

Tarîxê cinîyan bi fikir, kede, fedakarî û cesaretêkê pîlî yeno nûştene. Çalakîya ke hemraye Zîlane serra 1996 de viraşte hemverê komploya Rayberê ma, hemverê polîtîkayanê qirkerdişî û asîmîlasyonî yê sere şarê Kurdî û hemverê hetê sîstemê kapîtalîstî ra kolekerdişê cinî rê bîye cewab. Tewirê embaze Zîlane seba têgêrayîşê ma yê cinîyan xetêk a. Seserra 20’ine bîye seserrêka winayêne ke faşîzmî xo bi modelê netewe-dewlete mende kerd û na çarçewa de têgêrayîşê cinî talan kerd. Bêguman sere de bi çalakîya fedaîye ya embaze Zîlane ke serra 1996 de Dêrsim de viraşte, cinîyan hemverê sîstemê modernîteya kapîtalîste de tim xo ver da. Embaze Zîlane bi tewirê xo yê fedaîyî bîye wayîrê cuyêka manîdare. Bi çalakîya xo ya Dêrsimî ke sey şerwanêka azadîye ya cinî viraşte, tarîxê Kurdan de bîye cewabêko tewr bitesîr ê cinîyan ê hemverê terteleyê Dêrsimî ke serra 1938 de ame kerdene.

 ‘Çalakîya Zîlane Ganî bi Xurtî Bêro Famkerdene’

Ganî ma na çalakîya embaze Zîlane ke seba azadîya cinîyan viraşte bi xurtî manîdar bikerê. Zereyê na çalakîye de eşqo pîl ê cinîyan ê cuya azade ke wayîrê ruhê welatperwerîye yê pîlî yê wareyê xo yê esto. Zîlane bîya nameyê cigêrayîş û waştişê cuya seypêye û azade ya cinîyan.

Her wareyê cuye de bi temsîlkerdişê xete, rastî û eşqê Zîlane û bi awankerdişê azadîye ma eşkenê bibê cewab. Na yewe ra ganî her cinî xeta Zîlane xo rê esas bigêro, bi hawayêkê aktîfî û bitesîrî tewrê wareyê cuye bibo. Sîstemo ke serdestîya camêrdî ser o ronîyayo cinîyan tim zereyê cimatî ra vejeno yan zî gama ke tewrê wareyanê cimatkî keno înan ser o ferz keno ke vînayîş û mezgê serdestîya camêrdî sey koleyêk qebûl bikerê. Nêwazeno ke cinîyan sey hetêkê cuye, sey esasêko bingeyên ê cimatî bivîno. Na yewe zî bi zulm û zordarîye keno. Yanî serdestîya camêrdî bi aqilê xo wasiteyanê zordarîye bi xurtî şuxulneno û keno ke cuye bikero yew reng. Aqilê camêrdê serdestî, zihnîyetê camêrdî yo zordar, zûreker û dizdeker xo herinda rastîye de bica keno.

 Naye ra ganî ma cinîyî bi zihnîyetê modernîteya demokratîke projeyê neteweya demokratîke û konfederalîzmê demokratîkî rê serkêşîye bikerê. Na çarçewa de ganî ma rol û mîsyonê xo bi mirdîya xo bica bîyarê. Rayberê ma notanê xo yê pêvînayîşî yê peyênan de seba cinîyan vatibi, ‘Yan do bibê serkêş yan zî do bimirê.’ No ercnayîş qerardarîya na yewe yo ke mabên de mendiş çareserî nêya, rayîrê rastîye de ganî bibê Zîlane. Çîyo ke rastîya Rojakewtena mîyanêne de bi zihnîyetê AKP-DAÎŞ’î hemverê şaran û cinîyan de yeno kerdene, rîyê gêj û harî yê faşîzmê tarî yê qirkerdoxî yo. Tewiro fedaî yo ke şexsê Zîlane de hemverê faşîzmê tarîyî de vejîyayo werte, têgêrayîşê azadîya cinî kerd çimeyê umîdî û pêl bi pêlî vila kerd. Xeta mucadelekare û xoverdayoxe ya ke şexsîyetê Zîlane de vejîyaye werte bi ruhê fedaîyî hemverê heme problemanê cimatkîyan de temsîlê hêzê çareserîye yo. Terso ke aye verada zereyê kolonyalîzmî seba cinîyan ê Kurdan û heme cinîyan ê xoverdayoxan bi çimeyê cesaretî. Cinîyî gama ke no fam kerd û bi qerardarîye tewrê xebatanê awankerdiş û xopawitişî bîyî do biresê dereceyêka azadîye û organîzebîyayîşî.

 Na çarçewa de ma çalakîya embaze Zîlane reyna silam kenê û serrgêra 23’ine de aye bi rêz û hurmet bi vîr anê. Wezîfeyê ma yo bingeyên o ke ma waştişanê aye bica bîyarê. Ma do xoverdayîş, azadî, zihnîyetê demokratîkî û karê kulturî bikerê merkezê mucadeleyê xo û şorişê cinî bica bîyarê. Ma do bi tewrbîyayîş û bi cuya bi rengê Zîlane mucadeleyî pîl bikerê û bi ser bifînê.”