Koordînasyonê Komalên Jinên Kurdistan (KJK) bi wesîleya 25ê Teşrîna Peyêne Roja Xoverdayîşî ya Vera Şîdetê Serê Cinîyan a Dinya eşkerayîya nuştekîye daye  û semedê xurtkerdişê têkoşînî veng da cinîyan.

Eşkerayîya Koordînasyonê KJKyî ra qismêk wina yo:

''Ma sey KJKyî heme embazanê xo yê cinîyan ê xoverdayoxan û dostanê xo selam kenê. Ma veng danê ke wa roja têkoşînê hemparî dahîna bêra averberdene  û na 25ê Teşrîna Peyêne de wa vera şîdetî têkoşînê ma yo hempar dahîna bêro xurtkerdene.

Rojhelatê Mîyanên warê şerê germinî yo û qirkerdişê vera cinîyan dahîna eşkera yenê kerdene. Rejîmê îdamî yê dewleta Iranî, îqtîdarê çeteyan ê Afganistanî, Yemen, Sudan, Afrîkaya Vakure û welatanê bînan ê Rojhelatê Mîyanênî de vera cinîyan hêrişê giranî yenê kerdene. Polîtîka û qanûnê sey Îdamî ra heta lîncî, sunetê cinîyan ra heta pêzorî serepêşayîş û heta zewajê domanan her qey de hêrişê bêîradekerdişî û qetilkerdişî xo rê sey heqî vînenî. Vera nê hêrişan xoverdayîş û çalakîye zaf muhîm ê.

Pîya bi nînan çalakî û aktîvîteyanê  25ê Teşrîna Peyêne de ganî îdamê vera cinîyan bêro rojdemkerdene û sere de Îran dewletê ke hêrişanê teberê merdimîye kenê, bêrê deşîfrekerdene. Wezîfeyê ma cinîyan o ke ma wayîrê cinîyan ê ke îdamî pawenê bivejîyê. Ganî rayîrê serewedaritişî yê Şilere Resuli, Jîna Emînîyan de têkoşînê Jin, Jiyan, Azadî bêro xurtkerdene.

2024 de Kurdîstan de zî qirkerdişanê vera cinîyan bi giranî dewam kerd. Îqtîdarê faşîstî yê AKP-MHPyî koyan ra heta bajaran, gerîlayan ra heta şarê sîvîlî,cinîyan ra heta domanan her cayê Kurdîstanî her kesî rê hêrişê qirkerdişî rê dewam keno. Tewr peynî de vera Rojawan û Şingalî hêrişî kerdî û cinî, doman xeylêk sîvîlî qetil kerdî, dezgehê xizmetî yê komelî hedef girewtî sûcanê xo yê şerî rê dewam kerd. Efrînî ra heta Şingal, Başûrî ra heta Vakur, Rojawanî ra heta Mexmûrî her warê Kurdîstanî de sûcê şerî keno.

 25ê Teşrîna Peyênê de ganî cinîyî bibê vîrê cinîyan û domanan ê ke Kurdîstan de raştê îşkence, qirkerdiş û tecawuzî ameyî. Ganî ma bibê vengê cinîyan ê êzidîyan ke hema destê DAÎŞî de esîr ê, cinîyan ê ke Efrîn û Serêkanî de erdê xo ra bîyî. Ganî têgêrayîşê cinîyan ê Kurdîstan û Tirkîya pîya têkoşînê hemaparî xurtêr bikerê. Reyna ganî cinîyê xoverdayoxî yê zîndanan zî merê vîrakerdene.  Ma sey KJKyî xoverdayîşê dayîkanê xo yê xoverdayoxan zî selam kenê û reyna sozê xo newe kenê ma  do kulturê xoverdayîşê ke înan ra girewto xurtêr bikerê.

Ma bi têkoşînê xopawitişî eşkenê cinîyan, domananê kênayan, cinîyan ê ciwanan û dayîkanê xo bipawê. Ma sey KJKyî veng danê heme têgêrayîşanê cinîyan ê Kurdîstan, Rojhelatê Mîyanê û dinya ke wa emser 25ê Teşrîna Peyêne sey pancês rojî sey kampanyayêke rayra berê. 10ê ci ra heta 25ê teşrîna peyêne bi slogana 'Ma bi Jin, Jiyan Azadî xo pawenê' cinîyî wa vera şîdetî hêzê xo ramojnê. Ma bi Jin Jiyan Azadî ke Rayber Apo sey formulê efsûnî îfade keno, xo  û cuya xo bipawê. Semedê nê her warî bikerê warê çalakîye û zanîstî, ma destê yewbînan bigîrê, vengê xo bikerê yew û serdestîya camrêdî birijnê û cuyeya azad înşa bikerê.''