Koordînasyonê KJKyî bi eşkerayîyêke qetilkerdişê Mehsa Emînî bi hêrsî şermezar kerd. Eşkerayîye wina ya:

''Mezgê serdestîya camêrdan her ca de cinîyan kişeno.

Nameyê têgêrayîşê azadîye yê cinîyan ê kurdan ser o ma bi hêrs û nefretêkê pîlî qetilkerdişê Jîna Emînî (Mehsa) şermezar kenê ke hetê polîsanê exlaqî yê Îranî ra bi îşkenceyî kişîyabî. Ma serewedaritişê cinîyanê Îran û Rojhelatê Kurdîstanî selam kenê ke vera na barbarîye mojnenê. Bi na wesîle ma keyeyê Mehsa Emînî, heskerdoxanê aye û şare Kurdîstanî ra serweşîye wazenê.

Oyo ke perey Merîwan de kiştoxê dişmenê cinîyan ê bi nameyê Goranî kerdbi, Tehran de polîsanê exlaqî yê sîstemî dibare kerd. Nê wextî de ke dewleta Îranî ya dişmena cinîyan îşkence her ca de normalîze kena, kerdişanê vera merdimîye yê serê cinîyan sîstematîk kena, meşrû kena, kerdişanê kiştox û antîdemokratîkan zêdînena. Îran de xîret yeno kerdene ke hêzê muxalîfî bêveng bibê, têkoşînê azadîye yê cinîyan bi teda bêra çinkerdene û bi nê hawayî cînayetê cinîyan, îşkence, tecawuz, zewijnayîşê domanan benê nîşaneya sîstemê zorbazî û serdestîya seksîzme.

Dewletê faşîstî yê dişmenê cinîyan ke mezgê înan seksîst, dînperest, mezhebperest, neteweperwer û serwer o, bi polîtîkayanê xo yê qirkerdişê cinîyan bêmabên cinîyan qetil kenê, talan kenê, cinîyan ca û wareyê înan ra kenê, bêkar verdenê.

Çar hetanê dinya de cinîyî hetê mezgê serdestîya camêrdan ra qetil benê. No şer dinya de serwer o. Welatê ma Kurdîstan de zî cinîyan rê qirkerdiş yeno ferzkerdene. Çar parçeyanê Kurdîstanî de dewletê kolonyalîstî bi polîtîkayan qirkerdişî  cinîyan rê ferz kenê, wazenê komelî bê îrade verbidê û bifatisnê. Vakur de tecawuz, kiştiş, fuhuş û tîraykî vera cinîyan sey metodanê şerê taybetî yenê caardene, tedaya dezgehanê cinîyan yena kerdene, cinîyan rê warê sîyasetî yeno qedexekerdene, wekîlê şarî tepişîyenê, tepişteyê nêweşî vera nêdîyenê; nê pêro seba şiknayîşê îradeyê cinîyan ê xoverdayoxan ê. Rojawan de zî vera serkêşanê têkoşînê azadîye hêrişî yenê kerdene. Nê nîşaneya tersê sîstemê serdestîya camêrdan ê. Mesuldarê esasî û sûcdarî îqtîdarê sîyasî yê ke xîret kenê serdestîta camêrdan mîyanê komelî de ca bikerê.

Coka serebûtê kişîyayîşê cinîyan cîya nê qirkerdişê sîstematîk ê. Cinîyî hetê mezgê serdestîya camêrdan û dewletan ra yenê qetilkerdene. Zêdîyayîşê qetilkerdişê cinîyan heman wextî de nîşaneya rewşa krîzî ya sîstemî ya. Ganî ma vera hêrişanê bêperwayan ê hêzanê camêrdan têkoşînî pîl bikerê ke no hêz xîret kenê Kurdîstan de xoverdayîşê ma, komelbîyayîşê ma, erjanê ma, destkewteyanê ma, nasnameyê ma bifatisnê. Hêrişê nikayênî têna vera destkewteyanê cinîyan nê, raştê raşt vera cinîyan ê.

Qetilkerdişê cinîyan bîyê sîstematîk. Tek rayîrê vergirewtişê nê qirkerdişan, averberdişê xopawitişê cinîyan o. Ma sey cinîyan ganî nê hêz barbarî ra hesab bipersê ke bi mezg, polîtîka û kerdişanê xo mesuldarê esasî yê nê qirkerdişan ê.

Cinîyî hewcedarê berzkerdişê têkoşînî û pawitişê cewherî yê. Kerdişê barbarî yê rejîmanê faşîstan pêro hetanê cuye de cinîyan rê çoknayîşî ferz kenê. Wazenê ma biancê pozîsyonêk ke goreyê sîstemê serdestîya camêrdan ê. Ganî ma vera nê sîstemê barbarî têkoşîn bikerê. Ma venga şarê xo, cinîyanê Rojhelatê Kurdîstanî, cinîyan ê belûcî, fars û azerîyan danê ke vera polîtîkayanê dişmenîya serê cinîyan her warî de têkoşînê xopawitişî pîl bikerê, vera hêrişan ma bibê yew û xoverdayîşî pîl bikerê. Ewro vera na barîye bêvengîye yena manaya akerdişê verê qirkerdişanê neweyan. Ma dîyar kenê ke bi pîlkerdişê xoverdayîşê vera îşxal, kolonyalîzm û polîtîkayanê îqtîdarê camêrdan ê çar parçeyanê Kurdîstanî cuya cinîyan bi qîmet bikerê, cinîyî wa bi rêxistinkerdişî xo bihêz bikerê û bi nê hawayî bieşkê verê hêrişanê bêperwayan ê faşîzmî û seksîstan vindarnê.

Ma qetilkerdişê şerwana cinîye ya armenîye Anushe Abetyana ke hetê artêşa Azerbaycanî ra bi hêrsî şermezar kenê. Ma îfade kenê ke no qirkerdiş netîceya hişmendîyêka seyci ya, ma reyna pêro cinîyanê ke netîceya îşkence û tedayanê dewletanê kolonyalîstan de dinyaya xo bedilnaye yad kenê û soz danê ke ma nê sîstemî û serdestîya camêrdan ra hesab bipersê.''