Vizêr Wekîla afgane ya verêne Mursele Nebîzade (32) keyeyê xo de bi hêrişê çekdarî amebî qetilkerdene. Koordînasyonê KJKyî derheqê qetilkerdişê Nebîzade de eşkerayîyêke weşanaye. Eşkerayîye wina ya:

''Xeylêk welatanê Rojhelatê Mîyanênî de ewro krîz û kaosî bîyê xorinî, cinîyî yenê qirkerdene. Na rewşe tewr zaf Afganîstan de yena dîyene. Afganîstan de Talîban keno ke îradeyê cinîyan binpay bikero. Cinîyê Afganîstanî her warî de hetê Talîbanî ra yenê qedexekerdene. Rêxistinê sey Talîban, DAÎŞ û El Qayîdeyî dişmenîya cinîyan kenê, her cade polîtîkayanê qirkerdişê cinîyan kenê. Talîban verê çimanê pêro dinya de 2021 de îqtîdar vist destî.

Qetilkerdişê wekîla verêne Mursele Nebîzade netîceyêka rejîmê barbarî ya. Rejîmê Talîbanî çend îdîa bikero zî kerdoxê nê cînayetî nîyo ma baş zanenê ke kerdox kam o. Sîstemê serdestîya camêrdan, îqtîdarperest û seksîstî sebeb û sûcdarê nê kerdişanê vera cinîyan ê. Nebîzade ê cinîyan ra yewe bîye ke îdareyê Talîbanî ra dima welat nêteriknabi.  Vera raştîya cinîyan sîstemê serdestîya camêrdan pê pêro hêzê xo yê îqtîdarî hêriş keno.

Vera kerdişanê barbarîyan ê serê cinîyanê Afganîstanî ma venga pêro cinîyanê dinya danê ke paştî bidê cinîyanê afganan. Vera kerdişanê sîstemê serdestîya camêrdan ganî bi aqil, wijdan û rêxistinîya xo ma vera hêzanê dişmenanê azadîye wurzê we. Cinîyê Afganîstanî çend serrî yo vera rejîmê Talîbanî têkoşînî ra fek vera nêda. Ma têkoşînê wayanê xo yê Afganîstanî selam kenê, ma do bi cinîyanê dinya têkoşînê înan pîl bikerê, vera polîtîkayanê gemarinana ê dewletan tewirê xo bimojnê. Ma do yewîya cinîyan zî awan bikerê.

Ma sey cinîyanê kurdan sey vizêrî ewro zî hetê wayanê xo yê Afganîstanî de yê. Ma tim  têkoşînê azadîye yê wayanê xo yê Afganîstanî reyde yê. Ma do bi felsefeya 'jin, jiyan, azadî' her ca de pîl bikerê û ma înan reyde yê. Têkoşîno hempar ê azadîye yê cinîyan do merdimatîye bixelisno. Coka têkoşîn û xoverdayîşê cinîyanê Afganîstanî qetî do azadîye bîyarê ca.''