Koordînasyonê KJKyî seba aktîvîsta femînîste ya çepgîre Meredithe Tax mesajê serweşîye weşana.

Mesajê KJKyî bi kilmî wina yo:

''25ê êlula 2022yî de ma dosta xo ya ercîyaye Meredithe Tax kanserî ra vînî kerde û zaf kewtî vera ci. Wefatê aye sere de seba cinîyan seba pêro merdimîye vînîbîyayîşêko pîl o. Ma sey KJKyî sere de keyeyê aye rê pêro dostanê aye rê serweşîye wazenê. A do tim mîyanê têkoşînê ma de bêra vîrardene.

Aye emrê xo yê 80 serran de tim têkoşîn kerd, a tim pabesteyê femînîzmê radîkalî bîye, tim eleqe mojna têkoşînanê femînîstanê dinya. Aye bi xo ard ziwan ke dima ke têgêrayîşê cinîyan ê kurdan şinasnayo hoka ci ya ewnîyayîşî ya femînîste aver şîya. A hetêkî ra zî roşnvîr û nuştoxêke bîye ke verê serebûtanê komelî de hîsger bibî. Aye hem vera îqtîdarê Trumpî hem zî vera îqtîdarê faşîstî yê Erdoganî têkoşîn kerd. Aye tim na raştîye pawite ke têkoşînê sinifî û têkoşînê femînîstan yew o.

2014 de wextê hêrişanê DAÎŞî yê vera Kobanê de Rojawanî eleqeyê aye ant û dima zî qetî tim eleqe mojna şorişê cinîyan ê Rojawanî. Bi nê hawayî Meredithe Tax têgêrayîşê cinîyan ê kurdan nêzdî ra şinasna. Aye serkêşîya rêxistinîyayîşê komîteyanê 'Defend Rojava' kerde, tim hetê cinîyan ê kurdan de cagirewt. Aye tim dejê cinîyan ê kurdan pare kerdî û tim qirkerdişê vera kurdan rexne kerdî. Aye tim vatêne ke ganî her kes paştî bido kurdan.

Nê prosesî de wefatê embazêka sey Meredithe Tax ma rê dejêko pîl o. Ma tim fikr, pêşnîyaz û aktîvîteyanê aye ra xo rê îlham girewt. Şarê kurdî do qetî aye xo vîr a mekero. Cinîyê kurdî do tim têkoşînê xo de aye hetê xo de bivînê. Ma soz danê ke têkoşînê embaze Meredithe Tax biresnê serfîrazîye. Ma sere de keyeyê ci, dostanê ci rê heskerdoxan û pêro cinîyan rê serweşîye wazenê!''