Koordînasyonê KJKyî bi eşkerayîyêke xoverdayîşê 8ê Adare Roja Cinîyan ê Kedkaran a Dinya fîraz kerd.

Eşkerayîye wina ya:

''Cinîyanê Kurdîstanî hêrişê faşîzmî derbaz kerdî û xoverdayîş 8ê Adare de resna asta tewr berze. Înan pê xoverdayîşê xo yê heybetînî çêrî û hêvî dayê pêro kesan. Cinîyanê Kurdîstanî yê ke bi rojan warî pir kerdî, xoverdayîş da xo rê û bi qerardarî şîyî serê faşîzmî, manayêka newîye, ruh û têkoşînêko newe da 8ê Adare. Ma nê tewirê têkoşînî yo ke hesab perseno, îdîaya xo ya ameyoxî vejeno werte selam û fîraz kenê.

Ma nê serewedaritişê bêhempayî yê cinîyan o ke bi coşê xo moral dayo, bi tewirê xoverdayîşî têkoşîn komelkî kerdo, bi renganê xo yewrengîye teng kerdo selam kenê. Nê cinîyanê çêran rê selam bo ke bi vateyanê xo bendê faşîzmî rijnayî, bi tewirê xo warî pirr kerdî. Selam bo ê cinîyan ke Wan de bi coşê pîlî bîyî wayîrê tewirî, Silopî de bi vateyê xo û kulturê xo ruh da Botanî. Selam bo cinîyan ê kurdan, ereban, sûryanî, armenî û azerîyan ke Rojawan de îdîaya şorişî mojnaye pêro dinya. Selam bo cinîyanê Mexmûr, Şingaşî ke bi tewirê xo xoverdayîşî berz kenê. Selam bo cinîyan Tebqa, Minbic, Heleb û Şehba ke bi reng û kulturê xo waştişê azadîye berz kenê. Selam bo cinîyanê Kurdîstanî û Tirkîya ke vera faşîzm û rijnayîşê dewlete têkoşînê hemparî kenê.

Kurdîstan, Rojhelatê Mîyanênî, Ukrayna û xeylêk cayanê dinya de tewirê têkoşînî yo ke  8ê Adare Roja Cinîyan de vejîyayo werte eşkeno qederê se serran dîyar bikero. Cinîyê ke her cayê dinya de wetiştê we, înan sîstemê serdestîya camêrdan pers kerd, mehkum kerd û mojna dinya ke 'serkêşîya cinîyan de dinyayêka bîne mumkîn a.'

Sere de cinîyê Rojhelatê Mîyanênî pêro cinîyê dinya bîyî yew veng, polîtîkayê camêrd-dewlete serûbin kerdî. No zî destpêkê dewrê bi rayberîya cinîyan o. Têkoşîno ke Roja Cinîyan ê Kedkaran a Dinya de bîyo pîl têkoşînê prosesê ameyoxî eşkera kerdo.

Çar parçeyanê Kurdîstanî û teberê welatî de cinîyê Kurdîstanî bi 8ê Adare sere de vera faşîzmê AKP-MHPyî cewabo tewr zelal dayo hişmendîya serdestîya camêrdan. Cinîyan bi kultur, huner, tewir, qerardarî û têkoşînê xo mojna her kesî ke deyîrê înan ê ke do vajê û ameyoxê înan o ke do awan bikerê estê. Bi mîlyonan cinîyan waran de xo ver da û asta têkoşînê emserînî vete werte.

Ma nê pêro cinîyan, bi kelecanî û bawerîya tewirê têkoşînî reyna fîraz kenê ke bi rojan o her war bi renganê xo xemilnayo, xoverdayîşê cinîyan reyde weriştê payan ser, bi şîarê 'Wextê azadîya cinîyan o' wisar gandar kerdo. Weriştişê cinîyan mesuldarîyanê pîlan keno ma û têgêrayîşanê cinîyan mil. Ma reyna sond wanenê ke bi na qerardarîye mesuldarîya xo bîyarê ca, serkêşîya têkoşînê cinîyan bikerê.

Cinîyî serkêşîya têkoşînê komelkîyî kenê. Ma pê bawer ê ke tewirê têkoşînî yê cinîyan ê 8ê Adare roja xoverdayîşî Newroze de zî bi serkêşîya cinîyan do bibo komelkî û bireso asta tewr berze. Na çarçewe de sere de cinîyî û ciwanî nika ra ma venga pêro şarê ma danê ke bi hawayêkê xurt û biîdîa tewrê Newroze bibê û faşîzmî ra hesab bipersê.''