Îdarekaranê KJK’yî ra Koçerîn Amede derheqê xoverdayîşê herêma Xakurkê-Bradostî de qisey kerd.

Amede vat ke herêma Xakurkê ke mabênê hîrêgoşeyê Îran, Iraq, Tirkîya de yo hetê jeopolîtîkî ra wayîrê muhîmîyêka stratejîke yo û vat, “Herêma Xakurkê heman wextî de sey herêma Bradostî yena zanayene. Hem hetê tarîxî ra û hem zî hetê dewrê nikayênî ra coxrafyayêka xeylî muhîm a.”

Amede bale ante serê xoverdayoxîya na herêma û vat, “Na coxrafya çi rey ercanê xo yê kulturkîyan ra nêvisîyaye. Her tim kokê xo ser o zergûn bîye û bi nê hawayî estbîyayîşê xo pawit. Tarîx de na herême de tim şer qewimîya û bîye wareyêkê xoverdayîşî. Timî bîye hedefê hêrişanê hêzanê şaristanîye û bi organîzasyonanê eşîrkîyan û konfederasyonî xo hemverê hêrişan de pawit. Seba metodê xopawitişî yê Kurdan nimûneyêko xopawitişî yo.” Amede vat ke herêma Bradostî sey hempeymanêka xopawitişî ya û vat, “Na yewe çende bica bêro do cimat û şar xo hende bipawo, ercanê xo yê kulturkîyan bipawo.”

Muhîmîya Herêma Bradostî Seba Mucadeleyê Azadîye

Amede ard ziwan ke herêma Xakurkê seba tarîxê înan ê mucadeleyî zî xeylî muhîm a û vat, “Na herêmanê sereke û bingeyênan ra yew a ke mucadeleyê ma yê azadîye tede dest pêkerd. Rayberîye bi welatperwerîya xurte ya na herême zanabi, loma mucadeleyê na herêma muhîm dî. Na a herêm a ke embaz Egîd tede mend û munaqeşeyê destpêkî yê plansazîya Hemleya 15’ê Tebaxe amî kerdene. Wareyo ke pratîkê gerîla yê destpêkî tede ameyî kerdene. Na herêm a ke ma gama destpêkî ya gerîlatîye eşte. Seba tarîxê mucadeleyê  ma xeylî muhîm a.”

Xoverdayîşê Berîtane

Amede bale ante serê çalakîya fedaîye ya Berîtane (Gulnaz Karataş), ke serra 1992 de Xakurkê de viraştebî û vat, “Hemraye Berîtane bi hawayêk ke ro tarîxê herêma Bradostî yê xoverdayîşê PKK’yî yeno, şexsîyetê xo de xoverdayîşî aver berd û hemverê hêrişanê îşxalî yê TC’yî û hemkarîye, bi hawayêkê bêemanî heta guleyê peyênî şer kerde, mucadele kerd. Bi mesuldarîyêka pîle xover da, seba ke esîr nêkewo dest çalakîya fedaîye kerde. Derbeyêka pîle daye îşxal û xîyanetî ro.” Amede vat ke herêma Xakurkê de xîyanet raste ra ame wedartene û bi serkêşîya Berîtane xeta xoverdayîşî bi ser kewte.

Vengdayîşê Seba Şarê Başûrê Kurdistanî

Amede bale ante serê îşxalkarîya nê demî yê herêma Xakurkê û vat, “Şarê ma yê Başûrê Kurdistanî hemverê na îşxalkarîye de yo. Herêma Bradostî ê herêman ra yew a ke Kurdan estbîyayîşê xo ûca ra girewto. Pawitişê herêma Bradostî pawitişê estbîyayîşê xo yo. Seba naye zî lazimîya ma esta ke ma hîna zaf organîze bibê û çalakîyan virazê.” Amede ard ziwan ke bi nameyê têgêrayîşê azadîye yê cinîyan ê qerardar ê ke xeta Berîtane ya hemverê hêrişan û îşxalkarîye temsîl bikerê.