Wekîla HDPyî ya Amedî Gulîstane Kiliç Koçyîgît derheqê têkoşînê cinîyani rijnayîşê faşîzmî û tecrîdê vera Rayberê Şarê Kurdî Abdullah Ocalanî de ANFyî rê qisey kerd.

Koçyîgîte bale ante ser ke rejîmê despotîkî tim hêrişê azadîya cinîyan kenê û vat: ''Şer de zî wina yo. Her ca de hedefê îşxalkeran cinî yê. Tecawuz, tacîz, kolekerdiş, destsernayîşê heqanê, komelî ra teberverdayîş û sûcê şerî vera cinî û domanan yenê kerdene. Şerî tewr zaf tesîrê cinîyan kenê. Şer şîdetê komelkî, xizanîye, krîzê ekonomîkî zêdîneno.

Prosesê çareserîye de fikrê Abdullah Ocalanî yê serê haştîye û têkoşînê azadîya cinîyan, 10 madeyê Mutabaqatê Dolmabahçe mojna ma ke hewceyê ma bi prosesêkê senînî esto û mojna ke têna cinîyê kurdî nê cinî û şarê Tirkîya û Rojhelatê Mîyanênî hewceyê ney ê. Coka cinîyan bi hawayêkê cidîyî paştî daye nê fikran. Ewro ma vînenê ke AKPyî asayîş çin kerdo û enqazêk verda. Eke komel ewro eşkeno bineyk zî bibo nefes bigêro sebebê ci yo sereke têkoşînê azadîya cinîyan o. Metodê îdareyî yê AKPyî şer o. Ganî ma sey cinîyan nê hacetê şerî destê hukmatî ra bigêrê. Rayîrê ney zî rijnayîşê faşîzmî yo.''

Koçyîgîte îfade kerd ke tecrîdê vera Rayberê Şarê Kurdî Abdullah Ocalanî verê nê kerdişan akeno û vat: ''Tek rayîrê qedînayîşê tecrîdî rijnayîşê faşîzmî yo. Eke ma wazenê azadîya Abdullah Ocalanî bivisnê destî ganî ma têkoşînêkê xurtî vera faşîzmî bikerê. Heta ke no hukmat estbo çareserîye nêbena. Her ca de ganî ma têkoşîn bikerê. Prosesê vernîya ma semedê cinîyan prosesêko dîyarker o. Ya faşîzm zêdêr mende bibo yan zî ma do zêdêr têkoşîn bikerê. Ma neçare yê ke nê hukmatî çin bikerê, faşîzmî birejnê. Ma do xo rêxistin bikerê û xopawitişê xo xurtêr bikerê. Hêzo bingeyî yo ke do faşîzmî çin bikero cinî yê.''