Komeleya Cinîyan a Rosa veng da cinîyan ke  wa hemverê şidetê serê cinîyan ê ke trafîk de rast yenê  tewrê çalakîya  ‘Konvoyê Morî’ bibê.

Têgêrayîşê Cinîyan ê Azadî (TJA) derheqê qirkerdişê kulturî, îstîsmarê domanan û qirkerdişê xoza de dabi zanayene ke înan seba 5 mengan programê çalakîyan amade kerdo. Çarçewaya çalakîyanê ke do bi slogana “Seba vurayîş û azadîye ti zî hurze payan ser” bêrê viraştene de Komeleya Cinîyan a Rosa zî dest bi çalakîyan kena. Endamanê komele ke na çarçiwa de lez da xebatanê xo do 1’ê Tebaxe de Peyasê Amedî de Duryana Dinya de hemverê şidetê serê cinîyan ê ke trafîk de rast yenê çalakîya ‘Konvoyê Morî’ virazo.

‘Ganî Cinîyê Amedijî Reaksîyon Bidê’

Endama Komeleya Rosa Neslîhan Çobane, ard ziwan ke înan hemverê qirkerdiş û çetinîya serê cinîyan kampanya daya destpêkerdene û wina vat: “Ganî heme cinîyê Amedijî hemverê çetinîya serê cinîyan de hurzê payan ser û reaksîyonê xo bîyarê ziwan. Yeno waştene ke cinîyî heme wareyan ra bêrê îzolekerdene. Ma zî vanê ke ma nê qebul nêkenê û hemverê îzolasyonî de ma konvoyê morî organîze kenê. Ma do 1’ê Tebaxe de saete 19.00 de Duryana Dinya ya Peyasî de paweyê heme cinîyan bê.”

Endama Komeleya Cinîyan a Rosa Serra Bûcake zî bale ante şidetê serê cinîyan ser  û va: ‘’ Senî ke  ma her ca de rastê hêrişî yenê, Ma do vera hêrişê serê cinîyan her ca yê cuya biaçarnê cayê mucadeleyî.  Wa heme cinîyî tewrê çalakîya 1’ê Tebaxê bibê û wayîr heqanê xo bivejîyê.

Arîn Zumrute ke a zî endamanê heman komeleye ra yewe bî no çî ard ziwan: “Ma hemverê zihnîyetê heme şaşîyanê ke yenê kerdene erzenê milê cinîyan ser veng danê ke heme cînîyî tewrê çalakîye bibê.”