Komxebata Cinîyan ê Kurdan a Ewropa ya vera Îşxalê Kurdîstanî pê beşdarîya xeylêk temsîlkaranê dezgehanê cinîyan ê kurdan Hollanda de dest pêkerd. Komxebate de  vera îşxalê dewleta tirke û semedê têkoşînê hemparî veng ame dayene.

Komxebate pê marşê 'Ey Reqîb' dest pêkerd. Verî Hemsereka KNKyî Zeynepe Murad qisey kerd û vat: ''Ma prosesêkê hesas û krîtîkî de yê ke dewleta tirke hêrişê ma kena. Ma sey cinîyan pê têkoşîn û pê rêxistinî eşkenê verê nê hêrişan bigêrê.  Ganî ma sey cinîyan nîqaş bikerê, analîzan bikerê û pê birêka cidî tewirê xo yê vera îşxalkeran ramojnê.''

Sîyasetmedare Tuba Hezer ard ziwan ke dewleta tirke bi serran o Vakurê Kurdîstanî de qirkerdişan lena û cinîyî vera ney têgêrenê.

Vervatoxa Kongreya Starî ya Ewropa Dilşahe Osman bale ante têkoşînê cinîyan ser û vat: ''Cinîyan ê kurdan pê têkoşînê vera DAÎŞî morê xo da dinya ro. Ewro zî ê eşkenê pê têkoşînê hemparî vera îşxalkeran vinderê.''

Haskare Kirmizigul nameyê ekîpa Jineolojî ser o qisey kerd û vat: ''Cinîyî wayîrê ê hêz ê ke rayberîya têkoşînê vera îşxalî bikerê.''