Şaristanê Silêmanî yê Başûrê Kurdîstanî de serkêşîya Komîsyonê Cinîyan ê KNKyî û Yewîya Cinîyan a Kurdîstanî de bi şîarê 'Qirkerdişê cinîyan biqedînê' komxebatêke amebî kerdene. Komxebata cinîyan ê kurdan 'Qirkerdişê cinîyan biqedînê' bi netîcenameyêkî qedîyaye.

Netîcename de nê babetê girîngî vejîyayî vernî:

''-Ganî cinîyê kurdî û Kurdîstanî bi yewîye sînoran û astengîyan derbaz bikerê

-Ganî cinîyê Başûr, Rojawan, Vakur û Rojhelatê Kurdîstanî xo yewbînan ra mesuldar bivînê û bi rayîrê sîyasî û komelkî nîqaşanê xo rê dewam bikerê.

-Vera şîdet û qirkerdişî têgêrayîş erkêko exlaqî û wijdanî yo.

-Seba ke rolê înan bizêdîyê ganî cinîyî vera partî û terefanê sîyasîyan vengê xo berz bikerê.

-Pawitişê cinîyan ê êzidîyan erkêko verên ê cinîyan o. Ma venga pêro cinîyan danê ke seba cinîyan ê êzidîyan ê vînîbîyayeyan têbigêrê.

-Ma venga pêro dezgehanê cinîyan ê dinya danê ke vera hêrişanê îşxalî yê serê Kurdîstanî tewirê xo bimojnê, paştî bidê têkoşînê cinîyan ê kurdan.

-Ma venga pêro cinîyanê Kurdîstanî danê ke seba çareserîya mekanîzmayêka hempare têbigêrê.

-Erkê cinîyan o ke Konferansê Neteweyî yê Cinîyan ê Kurdîstanî bikerê.''