Çar parçeyanê Kurdîstanî ra Mayê Haştîye şaristanê Silêmanî yê Başûrê Kurdîstanî de semedê komxebatêke ameyî pêser. Mayanê Haştîye komxebata bi şîarê 'Ma pîya haştîye bîyarê ca' de hêrişê îşxalî yê Tirkîya û rolê mayan ê çareserîye nîqaş kerdî. 

Destpêk de panelê yewînî de dayîke Fewzîye Abdulkerîm qisey kerd û vat: ''Semedê qedîyayîşê îşxalî ganî ma zêdêr bixebitê û xîret bikerê.'' Dima mamosta û aktîvîste Sinûre Kerîm vat: ''Êyê ke xo ver danê domanê ma pêroyînan ê. La pê destê îşxalkeran keyeyê ma de yenê şehîdkerdene.''

Panelê diyînî de Pakîstane Mihemed qisey kerd û aye zî hêrişê Tirkîya yê vera Şingal û Mexmûrî ercnayî. Pakîstane vat: ''Kurdîstan Lozan de ame parçekerdene. Peymana Lozanî 2023 de do biqeda. Nê hêrişî do bibê sebeb ke Kurdîstan newe ra bêro parçekerdene.''

Endama Kongreya Starî Bêrîvane Mihemed îşxalê Rojawanî ser o qisey kerd û vat: ''Tirkîya Rojawan de waşt ke destkewteyanê ma çin bikera la do nêeşka armancê xo bîyara ca. Heta ke îşxal dewam bikero ma do xo ver bidê.''

Panelê peyênî de dayîke Amînaya ke Rojhelatê Kurdîstanî ra ya vat: ''Ez Hukmatê Herêma Kurdîstanî ra wazena ke wa hêrişanê Tirkîya û Îranî vindarno. Ganî ma hînî yewîya xo bîyarê ca, ganî verê rijîyayîşê gonîya domananê xo bigêrê.''

Peynîya komxebate de rayîranê çareserîye de rolê dadîyan ser o ameyî nîqaşkerdene û komxebate bi nê hawayî qedîyaye.