Qamişlo de bi şîarê 'Sûrîye de cinîyî binê îşxalê dewleta tirke de dejî ancenê' Konferansê Cinîyan ame kerdene.  Konferans de Ebire Hesaf, Stêre Qasim, Sîhame Emoke û Xalîya Keçwan bîyî endamê dîwanî.

Rojnamegere Nercîse Îsmaîl beşê yewinî de qisey kerd û îfade kerd ke xorinbîyayîşê krîzê Sûrîye de rolê Tirkîya pîl o. Nercîse bale ante ser ke dewleta tirke her roje herême dana bombayan ver û peymananê mîyanneteweyîyan binpay kena.

Îdarekara Forumê Samî yê Sûrîye Esmaa Kisar bi vîdeo tewra konferansî bîye. Esmaa dîyar kerd ke dewleta tirke vera cinîyanê Sûrîye teda kena û cergê DAÎŞî sûcanê vera cinîyan kenê.

Endama Meclîsê Sûrîyeya Demokratîke (MSD) Mecdoline Hesen pare kerd ke herêmanê îşxalkerdeyan de dewleta tirke vera cinîyan hêrişanê etnîk û cînsîyan kena. 

Beşê komelkî yê konferansî de Endamê Sûrîyay Rojhelatî Taze Başa, Corgête Bersûm, Sefa Taha, nuştoxa başûrije Kinere Ebdullah û akademîsyena Zanîngehê Tunusî Amale Qeramî qisey kerd. Înan zî vist vîrî ke herême de vera cinîyan sûc û hêrişî zêdîyenê.

Konferans de nê birî ameyî dayene:

-Seba ke herêmê îşxalkerdeyî bixelisê ganî krîzê Sûrîye bêro çareserkerdene.

-Îşxalê dewleta tirke wa bêro qedînayene.

-Sivîlî wa bêrê pawitene.

-Bînayê enkazî wa bêrê wedaritene.

-Seba ke şar bi asayî abigêro keyeyê xo û sûcê vera cinîyan biqedê ganî verî îşxalê dewleta tirke bêro qedînayene.

-Vera polîtîkayanê serê cinîyan, vera şerê dewleta tirke asta têkoşînî wa bêra berzkerdene.

-Seba ke awe sey çeke nêşuxilna wa dewleta tirke rê teda bêra kerdene.

-Seba ke herêmanê îşxalkerdeyan de rijîyayîş binawanîye bêro astengkerdene wa komîsyono mîyanneteweyî bêro ronayene.

-Wa sûcê dewleta tirke bêrê belgekerdene û dewleta tirke mehkemeyanê mîyanneteweyîyan de bêra muhakemekerdene.

Wina pawîyeno ke konferans bi netîcename biqedo.