Meclîsê Cinîyan ê HDPyî bi şîarê 'Ma azadîye de isrardar ê, têkoşîn de qerardar ê' 21-22ê gulane de Anqara de Konferansê xo yo 4. kerdbi. Meclîsî netîcenameyê konferansê xo eşkera kerd.

Netîcename de ame vatene ke konferans dîyarîya Aysele Dogan û Denîze Poyraz ameyo kerdene. Netîcename de îfade kerdene ke  şerê vera Kurdîstanî şerê Rûsya-Ukrayna ra dima kewto safhayêka newîye û no şer vera fikrê têkoşînê azadîya cinîyan yeno kerdene. Netîcename de ame parekerdene ke îqtîdar çarenêkerdişê meseleya kuran de israr keno, tecrîdê vera Rayberê Şarê Kurdî Abdullah Ocalanî keno giranêr û şerê îşxalî xorin keno.

Netîcename wina dewam keno:

''Îqtîdar her ca de wazeno destkewteyanê cinîyan çin bikero û cinîyan bêveng bikero.Rixmê nê hêriş, gef û teda zî ma zanenê ke hêzo ke eşkeno îqtîdarî çin bikero xoverdayîş û serewedaritişê cinîyan o. Ma vera rejîmê otorîterî her ca de xo ver danê, xo rêxistin kenê û serewedaitişî pîl kenê.

-Ma xîret kenê ke bibê vengê cinîyanê ke bi şîdetê camêrd-dewlete ameyê qetilkerdene. Ma do waştişê 'Edaletê camêrdî rê ney edaleto raştikên' rê dewam bikerê.

-Seba Peymana Îstanbulî ma têkoşînî pîl kenê.

-Ma vera hêrişanê serê sîstemê hemserekîye, hişmendîya qeyûmî têkoşîn kenê. Ma do vera nînan xo zêdêr rêxistin bikerê.

-Ma têkoşînê xo yê ekolojîkî rê dewam bikerê û vengê xo berz bikerê.

-Ma vera ê kesanê ke keda ma wenê vanê 'Kede yê ma ya, ameyox ê ma yo' û cuyêka newîye awan kenê. Ma vera ê kesanê ke ma cîya kenê, benê yew û têkoşînê xo xurtêr kenê. Ma vera koçberîye, şer û îşxalî têkoşînê xo pîl kenê. Ma têkoşîn û paştdayîşê cinîyan ê enternasyonelî xurt kenê.

-Ma benê vengê cinîyanê ke dewaya Gezî û Kobanê de tepişîyayî. Ma benê vengê Emîne Şenyaşar,  Gulistan Doku û cinîyanê Nobeta Edaletî.

-Ma hêrişanê dewlete yê vera goran û cenazayanê ma qebul nêkenê û vera ney vengê xo berz kenê.

Ma konferansê xo de rexneyî kerdî û rexneyê xo dayî. Ma bi hîrayî rêxistinbîyayîşê xo ercna. Ma metod û girîngîya têkoşînî nîqaş kerdî. Ma reyna bire daye ke rayraşîyayîşê azadîya cinîyan pîl bikerê û hêzê rêxistinkerdişê cinîyan xurt bikerê.

Goreyê ney netîceyê Konferansê 4. yê Cinîyan wina yê:

-Ma vera îqtîdarê serdestîya camêrdan, krîz û teda têkoşînê rêxistinkerdiş û komelbîyayîşî bikerê binge. Ma do sîyasetê Rayîrê 3. pîl bikerê, vera faşîzmî têkoşînî xurtêr bikerê û Îtîfaqê Demokrasî awan bikerê.

-Ma do têkoşînê xo yê vera şer, îşxal, tecrîd û kolonyalîzmî têkoşînê cinîyan ê dinya de bikerê yew. Ma bêpawitiş nîyê. Ma hêzê xo rêxistinîye, têkoşîn û paştdayîşî ra gênê.

-Ma vera şîdetê camêrdî, wedaritişê Peymana Îstanbulî, hêrişan, destsernayîşê heqê nafaka rê vanê bes o. Ma vera hêrişanê serê têkoşînê cinîyan, LGBTİ+, îstîsmarê domanan vengê xo berz bikerê.

-Ma do paştdayîşê cinîyan ê vera xizanîye, kedwerdiş, vetal û vêşanîye xurt bikerê. Ma do keda xo ya rêxistinkerde bipawê.

-Ma do sîyasetê cinîyan bihêz û xurtêr bikerê. Ma do her ca de û her wext azadîya cinîyan ê tepişteyan bipawê.

-Ma do vera polîtîkayanê şerê taybetî têkoşînê xo xurtêr bikerê.

-Ma do vera dewaya qefilnayîşê HPDyî fikrê HDPyî bipawê, pîl bikerê.

-Ma do vera talanê xoza têkoşînê ekolojîkî pîl bikerê, têkoşînî rê serkeşîye bikerê.

-Ma meseleyanê cinîyan do berê Meclîsî.

-Ma do wayîrê destkewteyanê ke bi bedelan gêrîyayê, bipawê. Ma do sey cinîyan cuya azade û têdûşte pîya awan bikerê. Sey Meclîsê Cinîyan ê HDPyî îdîaya ma pîl a, têkoşînê ma û xoverdayîşê ma pîl o! Ma wayîrê ê hêzê perspektîfî yê ke îqtîdarî bigêrê binê ablukaya xo. Xoverdayîşê cinîyan est o, hêzê ma yê vurnayîşî est o. Ma do bivurnê, cinîyî do bivurnê.

Birê ma yê konferansî wina yê:

-Binê sîwana Meclîsê Cinîyan ê HDPyî de Komîsyonê Ekolojî yê Cinîyan wa bêro ronayene.

-Vera xizanîye û kedwerdişê cinîyan têkoşîn bêro kerdene.

-Vera şer, îşxal û polîtîkayanê şerê taybetî têkoşîn bêro pîlkerdene û xurtkerdene.

-Paştdayîşê bi cinîyan ê koçberan û multecîyan wa bêro pîlkerdene.

-Meclîsê Cinîyan ê Ciwanan wa bêrê awankerdene.

-Akademîyê cinîyan ê sîyasetmedaran wa bêrê awankerdene.

-Polîtîkayê astengdaran ê xoser û edîlî wa bêrê averberdene.

-Sîstemê Hemserekîye wa bêro averberdene.

-Seba têkoşînê hemparî yê vera faşîzmî têkoşînê cinîyan wa bêro pîlkerdene.

-Têkoşînê vera şîdetê serê cinîyan de destkewteyê cinîyan wa bêrê pawitene.

-Seba azadîya cinîyan ê tepişteyan ê sîyasîyan têkoşîn bêro averberdene.''