Konferansê Cinîyan o 4. ê HDPyî bi şîarê 'Ma azadîye de isrardar ê, têkoşîn de qerardar ê' Salona Odaya Muhendîsanê Îklîmî (ÎMO) ya Anqara de ame kerdene û qedîya. 

Hemsereka HDPyî Pervîne Buldan, Vervatoxa Meclîsê Cinîyan Ayşe Acar Başaran, Meclîsê Partîye yê HDPyî, Endamê Heyetê Rayberdişê Merkezî, wekîlî, hemserekê şaristanan, Hemvervatoxa HDPyî Esengule Demîr, Hemsereka DBPyî Salîha Aydenîz, Hemsereka Partîya Sosyalîste ya Bindestan (ESP) Ozleme Gumuştaş, Hemvervatoxa Partîya Keske ya Çepe Ayşe Erdem, Sereka Partîya Şorişgêre Elîfe Torun Oneren,Sereka Partîya Newe ra Ronîyayîşê Sosyalîzmî Canane Yuce, aktîvîstê TJA, endamê Înîsîyatîfê Meclîsê Mayanê Haştîye û 300 delegeyî tewrê konferansî bîyî.

Salona konferansî de fotografê Aysele Tugluk, Denîze Poyraz, pankartê sey 'Hemserekîye xeta ma ya mor a', 'Xizanîya cinîyan rê ney, 'Ma Peymana Îstanbulî ra fek vera nêdê' ameyî akerdene.

Vizêr roja diyîne peyêne ya konferansî de serebûtê Kurdîstanî, Tirkîya û dinya ameyî ercnayene, reyna tecrîdê Îmraliyî, hêrişê îşxalî yê vera Başûrê Kurdîstanî, tepişteyê nêweşî, tedayê vera komelî ameyî nîqaşkerdene. Kombîyayîş de reyna pespektîfê komara demokratîke ame îfadekerdene. Konferansê Cinîyan ê 4. yê HDPyî de rayîr û metodê dewrê neweyî ameyî nîqaşkerdene û sîyasetê rayîrê hîrêyînî yê HDPyî  de serkêşîya cinîyan û qerardarîya têkoşînêkê bitesîrî yê vera hêrişanê serê destkewteyan vejîyayî vernî.

Konferans de cinîyan zehmetî û kêmasîyê têkoşînê rêxistinbîyayeyî ercnayî, pêşnîyazê xo pêşkêş kerdî û bire daye ke dewrê neweyî de rêxistinîya xo xurtêr bikerê. Cinîyan bire daye ke meseleyanê cinîyan ê astengdaran û merdimanê înan zî cibigêrê.

Cinîyan babetanê tecrîd, têkoşînê vera şer û îşxalî, polîtîkayanê şerê taybetî yê vera cinîyanê herême, ekolojî, hemserekîye û qerardarîya temsîlîya têdûşte û hêrişê vera destkewteyanê cinîyan de birî girewtî. 

Cinîyan bi sloganê 'Cinîye, Cuye, Azadîye' konferansê xo qedîna. Netîcenameyê konferasî rojanê verê ma de do bêro parekerdene.