Konferansê Cinîyan ê 4. yê Têgêrayîşê Cinîyan ê Azadan (TJA) Êlih de bi şîarê "Em li dijî faşîzmê bi biryar û di azadiyê de bi israr in" roja dîyine de dewam kerd.

Konferanso ke Vakurê Kurdîstanî û Tirkîya ra 700 delegeyî tewrê ci bîyî de kincanê neteweyîyayn ê renginan bale ante xo ser. Konferans de pankertê mesajanê azadîya cinîyan û fogografê cinîyan ê ke ameyî qetilkerdene İpeke Er, Denize Poyraz, Pinare  Gultekin, Firdevse Babat, Gulîstane Doku, Geribe Gezer û Jîna Emînî ameyî kiriştene. Konferans pê tîlîlîyan govende ameye girewtene.

Konferans de mesajê Vervatoxa Dewrî ya TJA Ayşe Gokkan ame wendene.  Gokkane vat: ‘’Ma zîndan de bi zî ruhê ma azad o. Cinîyê bi ruhê azadî vera camêrd-dewlete xover danê. Heta cinî û şarê ma bibê azad ma do têkoşîn bikerê. Bi nê hîsan ez konferansê cinîyan ê 4. selam kena. Heta şiknayîşê tecrîdî û azadbîyayîşê cinîyan ma do xover bidç. Ez şima cinîyan ê erjîyayeyan re selam kena.''

Badê qiseykerdişê akerdişî Hemsereka Pêroyî ya HDPyî Pervîne Buldan qisey kerd. Buldane vîst vîrî ke xeylêk cinîyê sîyasetmarî yê kurdî zîndan de yenê tepiştene û vat:  ‘’Cinîyî her ca de yenê qirkerdene, raştê tacîz û tecawuzî yenê, çîn hesibîyenî, înkar benê. Camêrdî zî ma ser o sîyaset kenê. Her şîdet û qirkerdiş polîtîk û sîyasî yo. Cinîyî bi fermanê dewletan, hukmatan yenê qetilkerdene.  Wa no hol bêro zanayene ke ê se kenê wa bikerê ma cinîyî do tim vera qirkerdiş û hêrişan payra bê. Camêrdî wa bizanê ke çîyo ke Jîna Emînî rê bîyo vera ma heme cinîyan ame  kerdene. Qirkerdoxî wa bizanê ke vera înan tewirê cinîyan o rêxistikerde est o. Sere de nê welatî de cinîyê kurdan raştê şîdetî yenê. Dinya de şîdetê vera cinîyan zêdîyeno. Eke ma merê têhet û pîya têkoşîn mekerê ma nêeşkenê verê şîdetî bigêrê. Coka ganî ma bibê yew û pêro pîya têkoşîn bikerê. Ma slogana 'Jin, jiyan, azadî' biresnê  her kesî û destûr medê ke qet cinîyêk zî bêro qetilkerdene."

Hemsereka Pêroyî ya DBPyî Salîha Aydenîz zî nê wina qisey kerd: ‘’ Wa kiştoxê cinîyan û êyê ke semedê îqtîdarê xo qesranê xo pawenê hola biewnî na heyate ra. Na heyete cewabê kiştoxanê cinîyan û êyê ke azadîye nêwazenê dana.  Kurdîstanê Rojhelatî vera qirkerdişî xover dano û no xoverdyaîşî ver bi azadîye şino. Êyê ke vera dîktatorîye xover danê ma înan rê selamanê xo şawenê.  Cinîyan ê kurdan semedê azadîye û ameyoxê xo bedelî dayî û hema zî danê. Sîstemê hemserekîye na ro. No sîstêm hema dewam keno. Ma do heta peynî nê sîstemî bipawê. Ma sey cinîyan ê kurdan sîstemê hemserekîye cinîyan ê dinya rê dîyarî kenê. Ma zanê ke yew wayîrê sîstemê hemserekîye û fîkrê ci est o. Wayîrê nê fîkrî Îmrali de binê tecrîdî de yo.Coka sere de cinîyê kurdan êyê ke sîstemê hemserekîye pawenê û vanê  ‘jin, jiyan azadî’  ganî semedê azadîya Rayberê Şarê Kurdî Birêz Abdullah Ocalanî zî têkoşînî pîl bikerê.’’