Fermandarîya Pêroyî ya YPJyî bi eşkerayîyêkepare kerd ke nînan mabênê 30ê hezîrane û 2yê temmuze de bi beşdarîya zafê endamanê xo konferansê xo yo çarin kerdo.

Eşkerayîye wina ya:

''Konferansê ma bi şîarê 'Bi hêzê cinîya azade ma do şorişê cinîyan û welatê xo bipawê, azadîya Rayber Apoyî bîyarê ca' bi coşî û bi qerardarî qewimîya. Konferansê ma de perpektîfê Rayberîye, mesajê têgêrayîşê cinîyan, rewş, newe ra awanbîyayîşî, Şerê Şarî yo Şorişgêr û planê wextê ameyoxî ameyî nîqaşkerdene.

Seba ke konferansê ma serrgêra şehadetê Zîlane (Zeynepe Kinaci) de ameyo kerdene israrê ma yê serê xeta fedayîtî û xoverdayîşî zî eşkera bi. Bi na wesîle ma ancî pare kenê ke mîrasê ci yê azadîye û rayraşîyayîşê ci yê serfîrazîye do bibê rêberê ma.

Konferansê ma tecrîdê Îmraliyî bi hawayêkê hîrayî ercna. Konferansê ma de ame îfadekerdene ke YPJ do serkêşîya Hemleya 'Rayber Apoyî rê Azadîye, Meseleya Kurdan rê Çareserîya Sîyasîye' bikero û seba azadîya Rayberîye pêro hêzê xo seferber bikero.

Konferansê ma de bire dîyaye ke YPJ do heq û destkewteyanê pêro cinîyan bipawo, îtîfaq û têkilîyanê dûştê cinîyan qebul nêkero. 

Vera Rojawanê Kurdîstanî hêrişê îşxalî yê dewleta tirke û cerganê ci dewam kenê. Vera nê hêrişan ganî pêro cinîyî tewrê refanê YPJyî bibê. Bi nê hawayî ma do bieşkê azadîya xo bipawê û wayîrê erjanê şorişê azadîye vejîyê.

Konferansê ma de di serrê peyênî hetê îdeolojîl û rêxistinîye ra ameyî ercnayene, kêmasî û xeletîyî ameyî analîzkerdene û xorexnekerdişî ameyî dayene. Ma konferans de bire daye ke YPJ newe ra bêro awankerdene. Naye ser o ganî ma Rojawan de Merkezê Pawitişê Cinîyan aver berê û rêxistinîye zixmêr bikerê.

YPJ sîwana xopawitişî ya pêro cinîyan a. YPJ nasnameyê cinîya rêxistinkerde ya. YPJ xobîyayîş o. YPJ pabesteyê Rayberîye û şehîdan o. YPJ pabesteyê paradîgmaya neteweya demokratîke yo û nameyê pêro cinîyanê dinya yo. Nê esasî ser o konferansê ma dîyar kerd ke YPJ amade yo ke dewrê neweyî de pêro erkanê xo bîyaro ca.

Sey YPJyî senî ke ma DAÎŞ bin vist ma do dewleta tirke ya faşîste, PDK û hemkaranê dişmenî yê bînan zî bin bivisnê û bi nê hawayî rolê xo yê serkêşîye bikerê. YPJ wayîrê ê hêzî yo ke xeyal û armancanê pêro cinîyan, şehîdan û keyeyanê şehîdan bîyaro ca. Nê esasî ser o ma vanê ke heta ke biresê serfîrazîye ma do bi ruhê şehîdanê xo yê sey Zîlan, Arîn, Rêvan, Sara, Ruken, Avesta, Barîn, Şervîn Şerdar, Sorxwin Rojhilat, Azadî Dêrik, Zozan Hesekê, Hebûn Enteriyê, Îvana Hoffman têkoşînê xo rê dewam bikerê û sibayanê azadan dîyarîya merdimatîye bikerê.''