Endama Koordînasyonê Kongreya Starî Ayşe Mahmud karê înan ê 2021î, têgêrayîşê înan ê cinîyan, şîdetê vera cinîyan ANFyî rê ercnayî.

Ayşe Mahmud ard ziwan ke Kongreya Starî 2021 de kongreya xo ya 8. kerde û vat: ''Pêro kantonan ra cinîyî tewrê na kongre bîyî û pêro birê kongre zî heta nika ameyî caardene. Ma hemleyê xurtî dayî destpêkerdene. 'Qirkerdiş û îşxalî rê nê, ma cuye û cinîye pawenê' zî nê hemleyan ra yew bi. Çarçewa ha hemle de ma perwerde û çalakîyî kerdî. Bira tewr girînge ya kongreya ma azadîya Rayber Apoyî bîye. Ma nê bingeyê ser o kar û xebatî ardî ca. Çalakîyanê emserînan de noqtaya tewr girînge çalakîyê cinîyan ê ereban bîyî. Cinîyan ê ereban Yewîya Cinîyanê Zenobîya awan kerde û vera hişmendîya DAÎŞî têkoşîn kerd.

Mîyanê serre de meseleyê cidîyî vejîyayî verê ma. Nînan ra yew zî îşxal û gefê dewleta tirke bîyî. Dewleta tirke serkêşê Kongreya Starî kerdî hedef, Kobanê ke embazê ma şehîd kerdî. Dewleta tirke bi nê hawayî wazena îradeyê ma bişikna la a do ser nêkewa. Eqsê ci her şehadet waştişê ma yê têkoşînî pîlêr keno. Dewleta tirke û MÎTî mîyanê komelî de şîdet vila kerd. Sey DAÎŞî dewleta tirke zî wazena herême de hişmendîya xo serdest bikera. Dewleta tirke tim xîret kena ke îrade û têkoşînê cinîyan bişikna. key ma yewîya xo arde ca Tirkîya hêrişê ci kerd. No têsîrê ma bikero zî ma têkokoşînê xo rê dewam kerd.''

Ayşe Mahmud herêmanê îşxalkerdeyan Efrîn, Girê Sipî û Serêkanîyê de rewşa cinîyan ser o qisey kerd û vat: ''Wayîrvejîyayîşê nê cinîyan biranê bingeyînan ê kongreya ma ra yew bîye. Nê herêman de vera cinîyan bi her hawayî sûcî yenê kerdene. Komîteya ma ya dîplomasî nê sûcan ser o belge û delîlî ardî pêser, dosyayî viraştî. Bi taybetî Efrîn de xeylêk cinîyî ameyî qetilkerdene. Dewleta tirke destûr nêdana ke teberî ra heyetêk yan zî çapemenîye xo biresnê nê herêman. Ma bi rayîranê cîyayan xo resnenê cinîyan. Nê herêman de cinîyî raştê tacîz, tecawuz, remnayîş, îşkence û tepiştişî yenê. Rixmê hende belge û dosyayan zî waro mîyanneteweyî vera sûcanê dewleta tirke bêveng o. ''

Ayşe Mahmud peynîya qiseykerdişê xo de îfade kerd ke dewleta tirke bi taybetî hêrişê cinîyan ê rayberan ê Rojawanî kena û bi nê hawayî xîret kena ke sîstemê Îdareyê Xoserî tasfîye bikera. Ayşe Mahmud vat: ''Têkoşînê ma vera ney, karê ma yê hişyarkerdişê komelî do dewam bikerê. Ma do bi perspektîf û barnameyêkê pîlî têkoşîn bikerê.''