Koordînasyonê Kongreya Starî serrgêra qirkerdişê dewa Helincî ya Kobanê  eşkerayîye daye ke de 23ê hezîrana 2020î de amebi kerdene û tede 3 cinîyî ameybî qetilkerdene. Kongreya Starî da zanayene ke înan na roje Roja Têkoşînê vera Kişîyayîşanê Polîtîkan ê Cinîyan' îlan kerde û na çarçewe de tay çalakîyan do bikerê.

Kongreya Starî eşkerayîya xo de Sema Yuce zî yad kerde û grevê vêşanîye yê zîndanan selam kerd. Kongreya Starî vist vîrî ke hêrişê dewa Helincî de cinîyê kurdî Zehra, Hebûne û dayîke Emîne şehîd bîyî û armancê nê hêrişî vindarnayîşê têkoşînê cinîyan ê kurdan bi. Kongreya Starî pare kerd ke rixmê pêro astengîyan zî têkoşînê cinîyan ê kurdan do dewam bikero.

Eşkerayîye wina dewam kena: ''Ma 23ê hezîrane sey Roja Têkoşînê vera Kişîyayîşanê Polîtîkan ê Cinîyan' îlan kerd. Ma do mabênê 17-30ê hezîrane de tim çalakîyan bikerê, mektubanê Sema Yuce, Zeynepe Kinaci biwanê, festîvale serûber bikerê, pêramotişê fotografan abikerê, hêrişanê vera Başûrê Kurdîstanî protesto bikerê, kişîyayîşanê cinîyan şermezar bikerê û 23ê hezîrane de Kobanê, Şehba û Dêrik de şehîdanê Helince yad bikerê. Ma venga pêro cinîyan danê ke tewrê nê aktîvîteyan bibê. Ma reyna şexsê Zeynepe Kinaci, Sema Yuce, Dr. Meryeme, Hanna, Hevrîne Xelef, Leyla Agirî, Zehra Kobanê, Sarya Kobanê, Melsa Dêrik de pêro şehîdanê ma yad kenê. Ma do xeyalanê înan bîyarê ca.''