Hemsereka KCDyî Leyla Guvena ke Zîndanê Xarpêtî de tepişîyena bi wesîleya Roja Dadîyan Emîne Şenyaşara ke verê Edlîyeya Riha de 9ê adare ra nata nobeta edaletî kena, rê mektubêke erşawite.

Mektube wina ya:

''Dadîya zerrîçere, 

To domanê xo deşta Pirsusî de ardbi dinya. Pê xîretan to domanê xo kerdî pîl. Ti qet nêfikirîya ke rojêke tabutê domananê to verê to  de rêz benê. To ê pê hîkayeya Îbrahîmo ke vera zulmê Nemrûdî xo ver da kerdî pîl. To ê pê hîşmendîya erjanê xo yê bin geyîyan ê merdimîye pîl kerdî. 

Dayîke Emîne. Mi verî waşt ez to rê binusa, mi zana ke çukeyêke nêeşkena dejê to bîyara ziwan. Dayîka cizîrije Esmere destê xo da serê tabutanê lajanê xo Mehmet Tunç û Orhan Tunçî venga zulmkeran dabi. Sakîne Arata ke 5 domanê ci têkoşîn de merdbî dejê xo kerd zerrîya xo û têkoşîn kerd. Her kes vengê to, hewarê to eşnaweno. Êyê ke vanê ma nêeşnawenê dejê to înkar kenê. Waştişê to yê edaletî fîraz û meşrû yo. Ma zanenê ke nê welatî de êyê ke kurdan kişenê bêceza manenê. Kiştoxî hêzê xo tîya ra gênê. 

Bi serran o ma vanê seba dadîyan dîyarîya tewr girînge haştî, aramî û cuyêka azad a. Heta waştişê Mayanê Şemeyî nêrê caardene mesajê Roja Dadîyan sexte yê û ma rê qet yew manaya ci çin a. 

Ti zerrîya xo rehet bigêre, nê rojî do derbaz bibê. Êyê ke domanê to qetil kerdî do hesab bidê. Ti zî zanena ke tarîx de heta nika qet yew raştîye binê tarîtîye de nêmenda. Ma soz danê to û pêro dadîyan; ma do teber û zere de pê têkoşînê xo layîqê şima bibê. Ma do haştîyêka rûmetêne şima ra bîyarê.

Dayîke Emîne embazanê ma yê Zîndanê Xarpêtî ra selamî estê.  Ma zerrîya to ya dejîne maçî kenê.''