Artêşa tirke ya îşxalkere 20ê çeleyê 2018î de hêrişê Efrînî kerd. Hêrişan ra 350 hezar roniştoxê Efrînî ca û wareyanê xo ra bîyî. Zafê koçberan 5 kampanê Şehba de ca bîyî. Nînan ra  yewe zî Leyla Mihemed Reşo ya ke Kampa Vegerî de manena.  Leyla ANFyî rê qisey kerd û qalê koçberîye û hêvîya agêrayîşî kerd.

Leyla îfade  kerd ke înan Efrîn de cuyêka weşe derbaz kerdêne û bi heywankarî û zîretî debara xo kerdêne.

Leyla vist vîrî ke înan 58 rojan Efrîn de vera artêşa tirke ya îşxalkere xo ver dayo û vat: ''Ma dejê pîlî antî. Wextê hêrişî de ez çalakîyanê xopawitişî de bîya. Dewa Xelîlî ya qezaya Şîyê de bîya  hedef. Ma hewt kesî bîyî. Mi embazê birîndarî û nêweşî girewtî. Dımanê mi zî şîyî dewa Qenterî. Şerwanî zî domanê mi bîyî. Çunke ê erdê ma pawenê. Ez şîya hetê şerwanan û mi birînê înan derman kerdî. Ma seba şerwanan nanî viraştêne. 

Dima ke artêşa tirke resaye dewa Çeqela ma neçare mendî ke dewa xo biteriknê. Mi nêwaşt ke keye û dewa xo biterikna. Mi erd, heywan û banê xo, xo pey de  verdayî. Tay kesan rayîrî ra dinyaya xo bedilnaye, tay cinîyan domanê xo vinî kerdî. Mi mêrdeyê xo 7 rojan nêdî. Ez  bîya şahîda qirkerdiş û şehadetan. 

Wexto ke newe hêrişanê vera Efrînî dest pêkerd ma depoyêk de 300 kesan reyde mendî. Ma vatêne ke heta şerwanî nêrê ma do nêşorê. Axir şerwanan zî vat ke ma pîya vejîya. Roja 58ine ya xoverdayîşî de ma Efrînî ra vejîyayî. Hîrê rojan ra dima zî ma resayî Şehba. 

7 serrî yo na kampe de ma pabeyê agêrayîşî yê. Cuya kampe bi taybetî seba cinîyan zaf zehmet a. Cinîyê ke eşiqê erdê xo yê nêeşkenê koçber bibê. Hamnanan û zimistanan de meseleyê cidîyî est ê. Xeyman de iciwîyayîş zehmet o. La ancî zî ma xo ver danê. Ma do cergan Efrînî ra vejê û bi rûmetî abigêrê Efrînî.''