Buroyê Aşitîye yê Cinîyan ê Kurdan (CENÎ) eşkerayîyêka nuştekîye weşanaye û vengdayîş heme cinîyan rê kerd ke tewrê Festîvala Cinîyan a Zîlane ya 15’ine bibê.

Eşkerayîya CENÎ de ame vatene, “Xoverdayîşê grevê vêşanîye yê bi serkêşîya Hemsereka KCD’yî û Parlamentera HDP'yî ya Colemêrgî Leyla Guvene hetê bi hezaran tepişteyanê hepisxaneyan ra, sîyasetmedar û aktîvîstan ra ame rayraberdene, hetê bînî ra cehdkerdişê bi hezaran cinîyan ê seba viraştişê weçînayîşanê cayîyan yê Tirkîya yê bi hawayêkê demokratîkî, nîşan da ke Tirkîya de polîtîkayê şer û çinkerdişî eşkenê bêrê astengkerdene. Bi vinetişê qerardarîya Leyla Guvene û Dayîkanê Aşitîye Tirkîya de seba demokrasîyî berêk abi. Seba girdkerdişê nê berî sere de cinîyî ganî heme hêzê demokratîkî yê Tirkîya dest bidê yewbînan.

Polîtîkaya hêrsdarî û şerî ya Tirkîya, serebutanê mîyanneteweyî ra girêdayî ya. Seba ke polîtîkayê şerî yê globalî bêrê qedênayene ganî cinîyî rolê xo yê polîtîk û cimatkîyî bîyarê ca,  wareyanê xozayî, aşitî û cuye zîhnîyetê camêrdanê serdestan rê nêverdê.

Xoverdayîşê cinîyan ê Kurdan hêz û hêvîye dano heme cinîyan ke temamê dinya de xoverdayîşê xo gird bikerê. Festîvala Cinîyan a Zîlane ya 15’ine bi şîyarê ‘Xoverdayîşê cinîyan azad keno’ do bêra viraştene û ma zî wazenê na festîvale de reyêka bîne bale biancê serê xoverdayîş û hêzê cinîyan û serkewtişê cinîyan pîroz bikerê. Ma vengdayîş heme cinîyan rê kenê ke bi reng û nîyadayîşê xo tewrê Festîvala Cinîyan a Zîlane ya 15’ine ya ke Leverkusenî de do bêra viraştene bibê.”