Vervatoxa Kombîyayîşê Cinîyan a Zenobîya Xûde El Îsa ANFyî rê qisey kerd û rewşa cinîyan a Rojawanî û hêrişê îşxalî ercnayî. 

Xûde bale ante serebûtanê Sûrîye ser û pare kerd ke ganî cinîyî Sûrîyeya newîye de bi xurtî bêrê temsîlkerdene. Xûde vat: ''Ganî parlamentoyê neweyî de cinîyan rê se ra 50 kota bêra dayene. Ganî sîstemê hemserekîye pêro beşanê îdareyî de bêro caardene. Ganî modelê Rojawanî pêro Sûrîye de bêro caardene. Seba Sûrîyeya demokratîke û têdûşte modelo tewr raşt Îdareyo Xoser o.''

Seba ke nameyê qralîça Zenobîya mufredatê perwerdeyî ra ameyo vatene Xûde nêrazîbîyayîşê xo mojna û vat: ''Zenobîya sembolê azadîye ya. Bi nê kerdişî nasname û tarîxê cinîyan ê Sûrîye çin hesibîya.''

Xûde vist vîrî ke Wezîrê Edaletî yê Sûrîye yo ke îdarekarêkê HTŞyî yo verê cû cinîyêke qetil kerdibî. Xûde vat ke ê dı naye qebul nêkerê. 

Xûde ard ziwan ke hêrişê îşxalî yê dewleta tirke raşta raşte cinîyan kenê hedef û vat: ''Nê hêrişan de endamê ma zî tede xeylê cinîyî qestî ra ameyî qetilkerdene. Dewleta tirke rêxistinîya cinîyan ra tersena û cinîyan ê serkêşan seba xo sey gefî vînena. 

Ma do vera îşxalkeran û îdeolojîya cîhadîstan têkoşînî ra fek vera nêdê û heta peynî destkewteyanê xo bipawê. Ma ancî vanê ke ganî modelê Îdareyê Xoserî bêro esaskerdene.''