Aysele Tugluka ke nêweşa demansî ya Dewaya Kumpasî ya Kobanê de bira veradîyayîşê aye dîyaye. La dewayêka bîne ra Tugluke hema zî tepişte ya. Seba Aysele Tugluk verî muracatê Mehkemeya Qanûnê Bingeyî (MQB) zî amebi kerdene la no muracat zî ame redkerdene.

Wezîrîya Edaletî, Mudirîya Pêroyî ya Asayîşî, Fermandarîya Pêroyî ya Cendirmeyan û Musteşarîya MÎTî veradîyayîşê Tugluke rê îtîraz kerd. Mehkemeya Cezaya Girane ya Anqara zî îtîraz red kerd û dosya şawite Mehkemeya Cezaya Girane ya Anqara.

Komeleya Paştdayîşê Cinîyan a Esenyaliyî ra Adîle Dogan, Pawitişê Cinîyan ra Zarîfe Akbulut û Rêxistina 'Seba Aysele Tugluk 1000 Cinîyan' ra Hemvervatoxa HDKyî ya Mugla Dîleke Gokçîn derheqê babete de ANFyî rê qisey kerd.

Adîle Dogan ard ziwan ke tewirê îqtîdarî yê vera cinîyan heman o û seba rewşa Aysele Tugluk ganî her kes wuroz payan ser. Adîle Dogan vat: ''Sebebo esas ê kîn û nefretê vera tepişteyêka nêweşe hêrsê vera meseleya kurdan o. Ma bi hezaran cinîyan xîret kerd ke seba Aysele veng vejê la no qîm nêkeno. Zorbazîya ke vera Aysele yena kerdene siba do fabrîkayêke de karkeran rê bêra kerdene. Ganî pêro cinîyê Tirkîya seba Aysele têbigêrê, paştî bidê aye. Ganî her beşê komelî wayîrê na mesele vejîyo.''

Dîleke Gokçîn zî îfade kerd ke Tugluke tim hetê bindestan de bîye û vat: ''Aysele Tugluk nîşaneyanê têkoşînê azadî û demokrasî ra yew a. Aye seba têkoşînê azadîye û têdûştîya cinîyan zaf kede daye. Ma eşnawit ke a pa embazanê xo koxûş de pê Korona kewta. Bira derheqê Aysele qetî huqûqî, zanistî, edîl nîya. Ci rê huqûqê dişmenîye yeno caardene. Verî ke erey nêbo Aysele Tugluk wa bêra veradayene û tedawî biba.''

Zarîfe Akbulut vist vîrî ke Dezgehê Tipê Edlîyî (ATK) raporê 'eşkena zîndan de bimana' dabi Aysele Tugluk û vat: ''ATK cara dezgehêko şikdar o. Hayîya ma pê cidîyetê rewşa Aysele est a. Aysele rê îşkence yeno kerdene. Ganî Aysele bêra veradayene. Seba ney zî ma têkoşînî kenê.''