Meclîsê Cinîyan ê Kongreya Awankerdişê Dêrsimî, derheqê îdîaya ke serekê Daîreyê Kirarî û Zanayîşî yê Unîversîteya Munzurî Cem Tekînoglûyî bi wendekaran ê cinîyan ê unîversîte bi zorî tayê qeymeqam û walîyan dir munasebetê cinsîyî dayo viraştene de eşkerayîyêk daye.

Tarîxê 24’ê Hezîran a 2019’î de goreyê tayê îdîayanê ke hesabanê medyaya sosyale de vejîyayî serekê Daîreyê Kirarî û Zanayîşî yê Unîversîteya Munzurî Cem Tekînoglûyî bi wendekaran ê cinîyan ê unîversîte bi zorî tayê qeymeqam û walîyan dir munasebetê cinsîyî dayo viraştene.

Meclîsê Cinîyan ê Kongreya Awankerdişê Dêrsimî bi eşkerayîyêk vera naye hêrsê xo ard ziwan. Eşkerayîye de ame vatene ke “Seke yeno zanayene dewleta faşîste ya kolonyalîste Kurdistan de û xusûsen zî Dêrsim de na mana de ‘eleqedarîyêka xusûsîye’ ramojnena. Hende ke cinîyê Dêrsimijî sey perçeyêkê şerê taybetî yenê hedefgirewtene.”

 Eşkerayîye de tayê qisimî wina yê:

“Şarê Dêrsimî û yê Kurdistanî, cinî sey anor, serkêş û raybera rayîrî vîneno. Dewleta camêrde ya kolonyalîste û kiştoxe ya ke na rastî zana, Dêrsim de zî xo rê şîyarê tarîxîyî yê ‘vernî de bide cinî ro” sey mîrasê polîtîka girewto. 

 Wa camêrdo faşîst ê sîstemê dewlete rind bizano, Qirkedişê Dêrsimî yê 1937-1938 de zî hemverê tacîzî de cinîyan teslîmîyet qebul nêkerdo û xo koyan ra eşto û kişto.

 Şorişê Kurdan de xoverdayoxîya Dêrsimî yak e bi serkêşîya cinî aver şina, tede xeylî dersî estê. O tena şorişêko sosyal yan zî kulturkî nêyo heman wextî de nê şorişî zihnîyetê kolonyalîstî yê camêrdî kokê ci ra lerznayo. Na yewe ra ma cinîyê Dêrsimijî tim sey hedef ameyî girewtene. Ma do hemverê tacîz û polîtîkayanê leyminan de bêveng memanê. Çunke pîrozîya Munzurî bi xoverdayîş û mucadeleyê cinî hîna beno manîdar.

Ma veng danê îdareyê Unîversîteya Munzurî ke herinda xebatanê zanistî û akademîye de bîya merkezê bêexlaqîye ke hemverê hêrişanê cinsîyan ê şexsê bi nameyê Cem Tekînoglûyî de wezîfeyê xo bica bîyarê.