Vera qetilkerdişê Emîne Bûlût a ke Kirikkale de hetê mêrdeyê ci yo verên ra verê çimanê kênaya ci ya 10 serrî de ameye qetilkerdene razînêbîyayîşî zêdîyenê. Endamanê Meclîsê Cinîyan ê Ciwanan ê HDP’yî yê Stenbolî yê ke Kadikoy de ameyî têhet hêrişê camêrd-dewlete yê vera cinîyan şermezar kerd.

'Xopawitiş Heq o, Qetilkerdişê Cinîyan Polîtik o'

Çalakîya ke binê ablûqaya polîsan de ameye viraştene de parlamenterê HDP’yî Huda Kaya û Dilşat Canbaze zî tewrê ci bîyî. Çalakîye de pankarta, ‘Xopawitiş heq o, qetilkerdişê cinîyan polîtik o’ ameye akerdene û sloganê,‘Ma huşnêkene, nêtersenê, îtaat nêkenê’ û ‘Cinî cuye azadîye’ ameyî eştene.

'Cinî Cînsêka Xosere û Azad a, Virsîya Camêrdî Nîya'

Huda Kaya ke çalakîye de qisey kerd va: ‘’Cinî cînsêka xosere û azad a, virsîya camêrdî nîya. Ma vera qetilkerdişan do mucadeleyê xo rê dewam bikero. Qêrayîşê Emîne Bûlûte yê ‘’ Ez nêwazena bimirî’ û yê kênaya ci ‘Daye memire’ ganî tim goşê nê cimatî de  bo. No qêrayîş helisyayîşê cimatê Tirkîya û polîtîkaya dişmenîye ya vera cinîyan cimat  fînayo çi hal eşkera ramojneno.’’ Dilşat Canbaze zî waşt ke semedê pawitişê cinîyan lezûbez pêkerdişê Stenbolî bêro caardene.

'Ma Do Hesabê Qetilkerdişê Cinîyan Bipersê'

Bado zî bi Meclîsê Cinîyan ê Ciwanan ê HDP’yî Gulîstan Yilmaze qisey kerd. Yilmaze va: ‘’Ma şîn de nê Payra yê. Ma do hesabê qetilkerdişê cinîyan bipersê. Heme cinîyê ke ameyî qetilkerdene ma semedê înan sere wedarenê û kuçeyan de yê. Ma vanê ke ma ra do kesêka bîne kêmî mebo! Dimayê eşkerayîye bi tîlîlî û sloganan çalakîya roniştişî ameye viraştene.