Hêrişê îşxalî yê dewleta tirke yê vera Başûrê Kurdîstanî dewam kenê. Hêrişan de warê sivîlî û gerîlayan dîyenê bombayan ver, qirkerdişî yenê kerdene. Yewinê hukmatê Başûrî zî hem hêriş kenê hem zî koordînatan danê.

Endamanê Înîsîyatîfê Mayanê Haştîye yê Vakurî venga hukmatê Başûrî da ke peynîya polîtîkayanê xo yê herişî bîyaro.

Endama Înîsîyatîfî Kurdrete Eryilmaz vat: ''Mesûd Barzanîyî verî vatbi ke 'Ez do meverda gonîya way û birayan birija.' Wa sozê xo bîyaro ca. Ma venga Barzanîyî danê ke wa rayîr nêdo polîtîkayanê gemarinan ê Tirkîya. Keyeyê Barzanîyî do senî hesab bido dadîyan û tarîxî? Eybêko pîl o ke dadîyî şîyî uca ke aqîbetê domananê xo bipersê la cewab nêdîya înan. Ez dadîyanê Başûrî rê vana ke êyê ke vera hêrişanê Tirkîya û keyeyê Barzanîyî sewtê xo nêkenê wa xo rê nêvajê dadî û kurd.''

Înîsîyatîfê Mayanê Haştîye ra Sabîha Tamrîş vat: ''Domanê tîya domanê kurdan ê. Ganî keyeyê Barzanîyî înan sey domananê xo bivîno. Eke dewleta tirke ewro bida ma ro siba zî dana înan ro. Keyeyê Barzanîyî eşkeno na gonî vindarno. Keyeyê Barzanîyî senî eşkeno bibo hetkarê nê polîtîkayanê gemarinan. Senî ke vakurijan berê xo wextê şerî de başûrijan rê akerdî wa nika zî kurdê Başûrî heman çi bikerê. Ganî vera îşxal û hêrişan vejîyê.''