Meclîsê Mayanê Haştîye yê Êlihî seba ke bale biancê tecrîdê serê Rayberê Şarê Kurdî Abdullah Ocalanî û xoverdayîşê zîndanan ser çalakîye kerde.

Bi tewrbîyayîşê wekîlan Parka Ataturkî de eşkerayîya çapemenîye ameye dayene. Hemsereka Pêroyî ya DBPyî Salîha Aydenîz û wekîlê HDPyî Felaknase Uca û Ayşe Acar Başaran zî paştî daye mayanê laçiksipîyan. Polîsan  pê wesayîtanê zirxinan mayî sey di grûban girewtî binê ablûqa. Polîsan waşt çalakîye asteng bikerê la cinîyan pê slogananê xoverdayîşî destûrê înan nêda.

Mayan pankarta 'Mayî tecrîdî şiknenê, haştîye awan kenê' akerde û fotografê Denîze Poyraza ke banê HDPyî yê Îzmîr de ameye qetilkerdene kiriştî. Salîha Aydenîza ke tîya qisey kerd vist vîrî ke vera tecrîdê serê Rayberê Şarê Kurdî Abdullah Ocalanî 266 rojî yo tepişteyî girevê vêşanîye de yê û vat: ''Destûrê mayanê ke wayîrê domananê xo vejîyenê nêdanê. Qiseykerdişê mayan ra tersenê. Laçikan ra tersenê. Mesajê haştîye yê dayîkan ra tersenê.''

Maya Haştîye Meyase Akdag zî bale ante tecrîdê serê Abdullah Ocalanî û binpaykerdişê heqanê zîndanan ser û vat: ''Ma wazenê wa grev biqedîyo. Vera cigêrayîşê rûtî û sûcanê merdimîye ma tîya de yê. Ma vanê hinî bes o, wa tepişteyî memirê. Tecrîdê vera kurdan rê hinî bes o. Na dişmenîye rê hinî bes o. Ma mayî têkoşînî rê do dewam bikerê.''

Badê eşkerayîye bi çapik û sloganan heta banê HDPyî yê Êlihî rayaşîyayîş ame kerdene.