Wekîla DEM Partî ya Mêrdînî Salîha Aydenîz derheqê destsernayîşê Colemêrgî de meclîs de vatbi ''Şima Kurdîstan de îşxalkerî'' Serekê Pêroyî yê MHPyî Devlet Bahçelî bi vatişanê faşîstan ê ''Na ganî zaf zerrî werda û cehd kena ke bêpelan berzî ra fir bida'' Aydenîz tehtîd kerd. Meclîsê Cinîyan ê DEM Partî derheqê babete de eşkerayîye daye û nê vatî:

''Serekê wertaxê qijî yê îqtîdarî yo ke bi vatişanê xo yê faşîstan û cinsî yeno zanayene qiseykerdişê wekîla ma Salîha Aydenîz ê vera sîyasetê qeyûmî hedef girewt û a tehdît kerd. Wa no zat hole bizano ke cinîyî vera nê tehdîtan bêveng nêmanenê. Ma do têkoşînê vera sîyasetê qeyûmî bidê domnayene.

 Raşto ma ma cinîyê cesûr ê. Êyê ke bi vatişê 'bêpelan firdayîşî' cinîyan tehdît kenê; Wa biwanê cinîyî senî pelanê xo kewnê. Ma bi têkoşînê xo vera serdestîye û sîyasetê camêrdan semedê azadîye û seyyewbînîye pelan kewnê. 

Ma vera nê tehdîtan milê xo çewt nêkenê. Ma zanê şima sey vizêrî ewro zî senî sîyasetê cinîyan ra tersenê. Ma cesaretê xo tradîsyonê xo ra genê. Tehdîtê vera Salîha Aydeniz vera heme cinîyan ameyî kerdene. Ma do vera nê têkoşînê xo xurtêr bikerê.

 Salîha Aydeniz têna nîya!''