Meclîsê Cinîyan ê HDPyî Îzmîr de kombîyayîşêkê çapemenîye serûber kerd, prosesê çalakîyanê 25ê Teşrîna Peyêne Roja Têkoşînê Vera Şîdetê Serê Cinîyan da destpêkerdene û vat: ''Vera şîdet, şer û xizanîye ma sere wedarnê.''

Vervatoxa Meclîsê Cinîyan Ayşe Acar Başaran, endamê Koordînasyonê Cinîyan wekîlî, endamê SYKP, DBP, ESP, Cinîyê Çepî yê Keskî, Mayê Haştîye, Rengê Xoverdayîşî, Meclîsê Cinîyan ê DADî, Anyakay-Der, Paştdayîşê Morî, TJA, EGE TUHAY-DER, Cazûyê Kampusî, Înîsîyatîfê Wendekaranê Azadan ê Îzmîrî, MMO Îzmîr zî tewrê eşkerayîye bîyî.

Eşkerayîye de ame parekerdene ke çar hetanê dinya de vera şîdetê camêrd-dewlete, pederşahî, şer û xizanîye cinîyî meydan de yê û vat: ''No serewedaritiş ewro kuçeyanê Îranî de bîyo Jîna, Şîlî de bîyo Las Tesis, Meksîka de bîyo Ni Uno Menos, Kurdîstan û Rojhelatê Kurdîstanî de bîyo 'jin, jiyan, azadî.' Têkoşînê cinîyan beno pîlêr, vera her tewirê astengîye bi paştdayîşê çar hetanê dinya dewam keno.''

Eşkerayîye de têkoşînê cinîyanê Rojhelatê Kurdîstanî, Îranî û pêro dinya ame selamkerdene. Dewamê eşkerayîye de dîya zanayene ke par 335 cinîyî ameyê qetilkerdene û polîtîkayê dewlete bîyê sebebê ney.

Eşkerayîye de ame vatene: ''Şer seba pêro cinîyan yeno manaya xizanî, şîdet, tecawuz û şîdetî. Îqtîdar xîret keno ke bi şer û kaosî nînan weye bikero û îqtîdarîya xo rê dewam bikero. La têkoşîn û serewedaritişê cinîyan vera ci yo. 25ê Teşrîna Peyêne de ma vera şîdet, şer û xizanîye sere wedarnê. Her ke îqtîdar hêrişê ma keno ma hende xo ver bidê, têkoşîn bikerê û vengê xo berzêr bikerê. Ma bi şîarê 'jin, jiyan, azadî' do vejîyê waran. Şîdetê camêrdan rê vajê 'no pasaran.' Ma hêzê xo yê rêxistinbîyayeyî bimojnê, do cuye bivurnê. Têkoşînê azadî û têdûştîye yê cinîyan do ser bikewê. Jin, Jiyan, Azadî.''