Vervatoxa Meclîsê Cinîyan ê HDPyî Ayşe Acar Başaran merkezê pêroyî yê partîya xo de eşkerayîyêke daye û vera bira destbendkerdişê 50 cinîyan nêrazîbîyayîşê xo mojna.

Endamê Meclîsê Cinîyan zî tewrê eşkerayîye bîyî. Başarane ard ziwan ke bi destbendkerdişan vera têkoşînê cinîyan hêriş yeno kerdene.

Başarane vat: ''Serdozgerîya Komare nê destbendkerdişî sey metodêkê klasîkî yê AKP-MHPyî sey 'operasyonê vera terorî' çapemenîye de vila kerdî. La ma hol zanenê ke no operasyon yeno çi mana û AKP-MHP wazeno tira netîceyêka senîne bigêro.

Ma prosesê weçînayîşî de yê. Hetêkî ra xîret yeno kerdene ke şer û kaos bêrê xorinkerdene, hetêkê bînî ra zî têkoşînê cinîyan bi tepiştişî, marjînalkerdişî û cîyakerî yeno hedefkerdene û bi nê hawayî yeno kerdene ke cinîyî apey gamêke bierzê. Hewteyê 25ê Teşrîna Peyêne de vera cinîyanê TJA, vera endamanê têgêrayîşê cinîyan ê kurdan no operasyon ame kerdene. Key ê teng benê hêrişê têkoşînê cinîyan keno. Îqtîdar keno ke bi nê hawayî payan ser de bimano.

Tirkîya de her roje cinîyî qetil benê û bi hawayêkê şikdarî mirenê. Îqtîdar herinda ke verê nînan bigêro cinîyan keno hedef. Şer beno xorinêr û faturaya ci zî cinîyan rê birîyena. Cinîyî seba ke vanê 'no şer, şerê ma nîyo' wina yenê hedefkerdene. Ma zanenê ke ê cinîyan ra tersenê. Çunke ewro modelê Rojawanî bîyo şorişêk û dîyarîya pêro cinîyan ameye kerdene. Sloganê 'Jin, jiyan, azadî' yo ke ewro Îran de vera her tewirê hêrişê rejîmê Malayan veng vejeno, pêro dinya de bîyo felsefeyêke. Coka cinîyê Îranî benê hedef. Afganîstan de seba ke cinîyî vera rejîmê Ralîbanî sereyê xo nêanê war, apey gamêke nêerzenê benê hedef.

Ma her ca de vanê ke qet yew hêz nêeşkeno verê têkoşînê cinîyan bigêro. Heta ke ma ra yew embaze zî bimana têkoşîn do dewam bikero. Ma reyna vanê ke ma do vera îqtîdarê şer û dişmenî AKP-MHPyî apey gamêke nêerzê. Ne bendê polîsan, ne zî operasyonê sîyasî yê destbendkerdişî û tepiştişî. Ma do embazanê xo yê cinîyan reyde mil bi milî têkoşînî rê dewam bikerê.''

Eşkerayîye ra dima Meclîsê Cinîyan ê HDPyî seba dîyarkerdişê xeta têkoşînî ya polîtîke dest pê kombîyayîşî kerd.