Meclîsê Cinîyan ê HDPyî çarçewa Kampayaya 'Semedê her kesî edalet' î Parka Kugulu de eşkerayîye daye û programê xo yê cinîyan eşkera kerd.

Eşkerayîya ke binê ablûqaya polîsan de ameye dayene de Vervatoxa Meclîsê Cinîyan a HDPyî Ayşe Acar Başaran qisey kerd. Başarane vat: ''Ma ewro reyna dîyî ke kampanyaya ma senî muhîm a. Nê welat de heq, huqûq binê ligan de yo. Heta binê postalan de yo. Wexto ke cinîyî yenê kiştene, cuye ra yenê îzolekerdene û semedê hetkarîye qîrenê hende asayîş çîn o. La ma têna eşkerayîye danê wina dormeyê ma ameyo girewtene. Cinîyî mergî rê yenê caverdayene. Wazenê verê têkoşînê cimîyan bişiknê. Şima se kenê bikerê ma do ne meclîs ne zî meydanan caverdê.''

Badê eşkerayîya ke parke de  ameye dayene wekîlî  şiyî Merkezê Pêroyî yê  HDPyî. Tîya bi tewrbîyayîş endamanê Meclîsê Cinîyan ê HDPyî eşkerayîye ameye dayene. Cinîyanê ke verê Merkezê Pêroyî de eşkerayîye daye pê kurdaleyanê moran rêz bîyî û sloganê xoverdayîşî eştî.

Başarane da pehesnayene ke înan Kampanaya 'Semedê cinîyan edalet'î daye destpêkerdene  û vat: ''Ma ewro semedê edaletê raştî ya tîya yê. Îqtîdaro ke kaosî ra xo weye keno teber û zere de polîtîkaya şerî dano rayraberdene.  Ewro vera bêedaletîye û tecrîdî nêrazîyayîşo pîl zîndanan ra yeno. Tepişteyê sîyasîyî vera tecrîdê serê birêz Abdullah Ocalanî 76 rojî yo grevê vêşanîye de yê. 

Tecrîd ewro bîyo nameyê şîdetê vera cinîyan, vêşanîye, feqîrîye, bêkarîye. Tecrîdî ra tewr zaf zî cinîyî ancenê. Îqtîdaro camêrd cinîyan keyeyan de heps keno. Ma semedê heme cinîyan edalet wazenê. Wextê îqtîdarê AKPyî de tewr tay 7 hezar  û 600 cinîyî ameyî  qetilkerdene, bi hezaran raştê şîdetî ameyî. Qetilkarî binê nameyê 'halê holî' de yenê veradayene. Semedê pawtişê Pêkerdişê Îstanbulî  ma vanê qirkerdişê cinîyan rê bes o semedê cinîyan edalet. Semedê sîstemê hemserekîye ke hedefê îqtîdarî de yo ma vanê edalet. Cinîyê ke her ca de feqîrê ancenê ma semedê înan vanê edalet.

Ma semedê cinîyanê vera şîdetê camêrdî xo pawenê vanê edalet. Cinîyê ke cuye û xoza pawenê ma semedê înan vanê edalet. Kurdîstan de bitaybetî vera cinîyan ê ciwanan polîtîkaya leymine yena rayraberdene. Bi desan cinîyî ameyî qetilkerdene la hêzê dewlete yê qetilkarî serbestê. Wendekarê cinîyî yê ciwanî yê Bogaziçiyî û cinîyanê ke paştî daye înan raştê hêrişê fîzîkî û cinskî ameyî. Ma semedê cinîyan ê ciwaman vanê edalet. Vera LGBTİ+yan nizdîbîyayîşê nefretî zêdîyeno. Ma semedê komelî ke rengê cîyayî sûç nîyê vanê adlet.

 Îqtîdarê AKP-MHPyî kuçe, keye, farîka, mektebî heme kerdî sey hepisxaneyî. Cinîyî tecrîdkerde nêeşkenê nefes bîgirê. Coka ma vera îqtîdarî vejîyenê. Edaleto ke pê mûm yeno cigêrayene ma cinîyî do bîyarê. Ma do rixmê heme hêrişan her ca de semedê edaletî bigîrê.  Ma tîya ra veng danê heme cinîyan. Ma ver bi 8ê Adare şinê. Ma semedê cuyeya adîle û azade têkoşînî pîlêr bikerê. Ma do pê îradeyê cinîye û paştdayîşe cinîye sîstemê camêrdê serdestî bibedilnê. Ma do ser bikewê. Semedê cinîyan edalet.''