Meclîsê Cinîyan ê HDPyî derheqê qetilkerdişê Denîze Poyraz û betalkerdişê Pêkerdişê Îstanbulî de verê Meclîsî de eşkerayîye daye.

Vervatoxa Meclîsê Cinîyan Aşe Acar Başaran bale ante polîtîkaya hêrişkare ya hukmatî ya vera cinîyan ser  nê vatî: ''Îtîfaqê camêrdî ke wazeno rejîmê yew merdimî ser o payra bimano sere de cinîyî pê zextî wazeno heme muxalîfan bêveng bikero û bido çokdayene. No îqtîdaro ke dişmenê komel,xoza, cinî û domanan o hinî nêeşkeno rîyê xo yê raştî binimno. Rayberê rêxistinanê sûcî reyna hemkarîya dewlet-çete-mafya vetî werte.  Pê hêrişkêrdişê komelî wazenê sûcanê xo binimnê. Xora ê cinîyan sey tehlukeyê tewr pîlî vînenê coka tewr zaf hêrişê înan kenê.

Îqtîdaro ke pê qanûnan hêriş, tacîz û tecawuzê vera cinîyan û domanan meşru keno qetilkar û tecawuzkaran paweno, janê Korona zî sey firsetî şuxulna  û seba ke cinîyan keyeyan de heps bikero bi caardişê Kod 29î verî cinîyî karî ra vetî. Îqtîdaro ke wazeno cinîyê muhtacê camêrdî bikero wa bizano ke ma do destkewteyanê xo camerverdê û wayîrê keda xo vejîyê.

Netîceya polîtîkaya cînskî, mîlîtarîst û nefretî de Denîze Poyraz ameye qetilkerdene. Bi vatişê 'Denîze terorîst a' ame waştene ke qirkerdiş bêro meşrukerdene. Cinîyî do hesabê nê sûcî bipersê. Caverdayîşê Pêkerdişê Îstanbulî qebulkerdişê dişmenîya cinîyan o.

Ma ewro tîya ra reyna veng danê. Şima do nêeşkerê vengê cinîyan bibirnê û serewedaritişî cinîyan bifatisnê. Pê qirkerdiş û zext, hêriş û dewaya qefilnayîşî ya vera partîya ma şima nêeşkenê verê ma bigêrê. Ma do vera heme zextan her ca de pê xoverdayîş cewab bidê. Cinîyî do wayîrê destkewtenê xo vejîyê û meverdê keda înan bênetîce bimano. Ma Pêkerdişê Îstanbulî canêverdenê. Denîze û heme cinîyan ê ke ameyî qetilkerdene rê sozê ma esto, ma do têkoşînî pîlêr bikerê û peynî ra tewr peynî de vera hêrişê camêrd-dewlete ser bikewê.''