Meclîsê Cinîyan ê HDPyî netîcenameyê kombîyayîşê xo yê 10ê teşrîna peyêne eşkera kerd. Netîcename wina yo:

''Bi nêzdîbîyayîşê 25ê Teşrîna Peyêne Roja Têkoşînê Vera Şîdetê Serê Cinîyan ma Anqara de bi qerardarîyêka pîke kombîyayîşê xo yê Meclîsê Cinîyan kerd. Ma nê 25ê Teşrîna Peyêne dîyarîya embaze Denîze Poyraz kenê ke Îzmîr de netîceya şîdetê camêrd-dewlete de ameye qetilkerdene.

Ma Meclîsê Cinîyan pê fîrazkerdişê 1ê Teşrîna Peyêne Roja Kobanê ya Dinya akerd, ma pê Şorişê Rojawanî cewabê vatişê 'Kobanê ha kewena' da û ewro zî ma pê têkoşînê xo cewabê wayîranê nê vateyî do bidê.

Ma kombîyayîşê xo yê Meclîsê Cinîyan de bi qerardarî kerd û sozê awankerdişê cuya têdûşte ya vera rejîmê camêrdî reyna ard ziwan.

Sernameyanê tewr girîngan ê nîqaşanê ma ra yew zî sîyasetê rayîrê hîrêyînî bi. Ma hedef kerd ke pêro dezgehanê cinîyan reyde qisey bikerê, pê amadekerdişê bernameyêkê zengînî vengê pêro cinîyan bi rayîrê hîrêyînî bidê eşnawitene.

Nîqaşan de ame tesbîtkerdene ke prosesê îqtîdarê AKP-MHPyî de hêrişê vera cinîyan û destkewteyanê cinîyan zaf zêdîyayî û îqtîdar keno ke verê xoverdayîşê cinîyan bigêro. Coka îqtîdarî cezaya zîndanî ya 30 serran daye Ayşe Gokkan. Başake Dogana ke werteyê rayîrî de kişîyaya û Çîleme Dogana ke maruza îşkenceyê sîstematîkî bîye û xo pawit nîşaneyê dişmenîya serdestîya camêrdan a vera cinîyan a.

Camêrdê serdestî hêrişê vera destkewteyanê cinîyan rê dewam kenê. Ma do pê awankerdişê îtîfaqê cinîyan û pîlkerdişê têkoşînî cewabê tewr raştikênî bidê nê hêrişan. Cinîyî do Peymana Îstanbulî ra fek vera medê.

Meclîsê ma yê Cinîyan 25ê teşrîna peyêne de bi şîarê 'Vera şîdetê camêrd-dewlete, şer û xizanîye ma her ca de yê' do vejîyo meydanan. Vera îtîfaqê camêrdan o ke cinîyan keno xizan ma do vajê 'Xizanîya cinîyan rê ney, semedê cinîyan edalet.'

Vera her tewirê polîtîkayanê şerî, îşxalî û kolonyalîzmî ma do îtîrazanê xo bîyarê ziwan û haştîyêka rûmetêne û edîle awan bikerê. Ma reyna bi hawayêkê qerardarî anê ziwan ke vera polîtîkayanê AKP-MHPyî têkoşînê azadîya cinîyan do ser bikewo.

Vera hêrişanê serê destkewteyanê cinîyan wext wextê azadîya cinîyan o, wext wextê rijnayîşê îqtîdarê camêrdî yê AKP-MHPyî yo, wext wextê caardişê îtîfaqê cinîyan û awankerdişê cuya newîye yo. 25ê teşrîna peyêne de kuçe, meydanan de wext wextê vateyê 'vera şîdetê camêrd-dewlete, şer û xizanîye ma her ca de yê' yo.''