Meclîsê Cinîyan ê HDPyî vizêr 9ê êlule de kombîyayîşê xo kerdbi. Meclîsê Cinîyan kombîyayîşê xo dîyarîya Semra Guzel û pêro cinîyanê ke sereyê xo nêanê war, kerd.

Netîcename de nê mesajî ameyî dayene:

''Ma nê prosesî de ke vera şarê ma, destkewteyanê ma û waranê ma yê cuye hêrişî zêdîyayê xo ver danê û têkoşînê xo berz kenê.

Hedefê polîtîkayanê tecrîd û şerî dînamîkê azadîgîrîya cinîyan ê. Îqtîdar pê ferasetê neo-kolonyalîzmî her roje hêrişê Rojawanî keno. Bi taybetî cinîyê ke vera DAÎŞî têkoşîn kerd benê hedef. Îqtîdar seba ke Herêma Kurdîstanî de operasyonê xo yê îşxalî de ser nêkewtp verê xo dano Yunanîstanî. Îqtîdar keno ke kaos û şerî bizêdîno. La şeran de tewr zaf cinîyî mexdûr benê.

Xizanîya cinîyan zî bîya meseleyanê esasan ê welatî ra yewe. Seba ke îqtîdar nêeşka prosesê pandemî îdare bikero cinîyî bêkar mendî û reyna nê prosesî de şîdetê vera cinîyan zêdîya.  Kurdîstan de polîtîkayê şerê taybetî cinîyan rê bênasnametîye ferz kenê û kenê ke xoverdayîşê cinîyan bin bikerê. Îqtîdar binkerdişê xoverdayîşê cinîyan xo rê sey armancê esasî vîneno.

Vera nînan ma sey Meclîsê Cinîyan ê HDPyî anê ziwan ke vate û hêzê ma est o ke nê îqtîdarî bin bikerê û cuya newîye awan bikerê. Hînî wextê ci ameyo ke no îqtîdaro camêrd birijîyo. Meclîsê ma têna rijnayîşê nê îqtîdarî nê rijnayîşê sîstemê serdestîya camêrdan keno hedef. Xoverdayîşê cinîyan do seltanatê şima birijno.

Meclîsê ma yê cinîyan plansazîyêka xurte vete werte. Bi nê hawayî ma reyna anê ziwan ke do vera qirkerdiş, tecrîd û şerî cuya azade, têdûşte û edîle awan bikerê. Ma her warî de serewedaritişê xo berz kenê û vanê; ma do xo rêxistin bikerê, xo ver bidê û bivurnê.''