Meclîsê Cinîyan ê HDPyî yê Amedî pê şîarê 'Ma seba azadîya xo, xo rêxistin kenê, pê ruhê Denîzan ver bi azadîye şinê' ronayîşê xo îlan kerd. Hemvervatoxa Meclîsê Cinîyan ê HDPyî Ayşe Acar Başarani aktîvîstê Têgêrayîşê Cinîyan ê Azadan (TJA), Wekîlê HDPyî Remzîye Tosun û Semra Guzel zî tede xeylêk cinîyî tewrê bernameyê ronayîşî bîyî.

Salona bernameyî de fotografê Denîze Poyraz û pankarta bi nuşteyê 'Ma seba azadîya xo, xo rêxistin kenê, pê ruhê Denîzan ver bi azadîye şinê' ameyî akerdene. Cinîyî pê kincanê xo yê tradîsyonelan tewrê bernameyî bîyî û înan govende girewte.

Ayşe Acar Başaran bername de qisey kerd û pare kerd ke çew nêeşkeno HDPyî asteng bikero. Başarane vat: ''Hêzê xorinî û gemarinî partîya ma kenê hedef. Ma betalkerdişê Peymana Îstanbulî ra fam kenê ke cinîyî hedef de yê. Ê bi nê hawayî sîstemê hemserekîye hedef kenê û vanê 'têkoşîn mekerê.' Cinîyî seba ke nê sîstemî ra bixelisê têkoşîn kenê. Meclîsê Cinîyan ê HDPyî do vera şîdet, şer û polîtîkayanê rantî têkoşîn bikero. Amedî rê mesajê ma no yo ke ma têkoşîn bikerê ke roşnîya Denîzan veng bida nê sîyasetî.''

Qiseykerdişan ra dima cinîyan yew fekî ra vat 'Cinîye, Cuye, Azadîye.'