Meclîsê Cinîyan ê Rojawanî pê şîarê 'Şorişê cinîyan temînatê komelê demokratîk û azadî yo' salona Zanîngehê Rojawanî yê Qamişloyî de kongraya xo ya yewine kerde.

 Kongreya ke vizêr ameye kerdene 200 delegeyî tewrê ci bîyî. Kongre de badê qiseykerdişan raporê Meclîsê Cinîyan ê Rojawanî ame wendene. Vernîyazê cinîyan ameyî girewtene û semedê koordînasyonê meclîsî 21 cinîyî ameyî vîjnayene. Mîyanê nê cinîyan 7 endamê partîyanê sîyasîyan estê.

Kongre de qerarê ke ameyî girewtene wina yê:

Semedê munaqeşekerdişê rewşa cinîyan ê ke binê îşxalî de yê do konferansêk bêro kerdene.

Semedê averşîyayîşê cinîyan ê ke karanê sîyasîyan kenê do komxebatêk bêro kerdene.

Paştdayîşo ekonomîk do bidîyo cinîyan û semedê nayî komxebatêk bêro kerdene.

Seba ke verê konseptê şerê taybetî bêro girewtene cinî û komel do bêrê perwerdekerdene.

Seba ke tekîlîya rêxistinanê Sûrîye bêro xurtkerdene dinya her hetê dinya de do xebatî bêrê kerdene.