Meclîsê Cinîyan ê HPDyî bi wesîleya serrgêra 10. ya îmzakerdişê Pêkerdişê Îstanbulî Sûrê Amedî û Taksîmê Îstanbulî de vejîyayî kuçeyan.

Amede wekîlê  HDPyî  yê cinîyî şiyî serê sûranê tarîxîyan û tîya pankarta ke sero nameyê 106 cinîyan ê ke 2021 de pê şîdetê camêrdan ameyî qetilkerdene aliqnaye. Vervatoxa Meclîsê Cinîyan ê HDPyî Ayşe Acar Başarana ke tîya qisey kerd vist vîrî ke Pêkerdişê Îstanbulî  yo ke pê bedelanê pîlan  ê cinîyanê ame qebulkerdene serekê pêroyî yê AKPyî bi derbeyêke fes kerd û vat:  ''A roja ra nata cinî yê Kurdîstan û Tirîya de kuçeyan de qîrenê û vanê ke ê derbeya yew merdimî qebul nekenê. Ma sey Meclîsê Cinîyan ê HDPyî Amed de bele ancenê yew heqîwetî ser, eke Pêkerdişê Îstanbulî biameyêne caardene, nê cinîyê ke nameyê înan na pankarte de yo nika ciwîyayêne. Cinîyan hema qala xo ya peyêne nêvete. Heta ke ma mevajê qedîyaye na mesele do nêqedîye.''

Bi eynî waştişê wekîlê HDPyî zî tede xeylêk cinîyê Îstîklalê Îstanbulî de vejîyayî kuçeyan vat Pêkerdişê Îstanbulî ê înan o ê do ey cameverdê. Rayraşîyayîşê cinîyan o ke binê ablûqaya polîsan de ame kerdene Meydanê Galatasaray de qedîya. Cinîyan tîya eşkerayîyêke daye. Cinîyan betalkerdişê Pêkerdişê Îstanbulî sey şerê vera cinîyan hesibna û vat ê rixmê heme hêrişan ê do rolo ke hetê îqtîdar û camêrdan ra înan rê fasilyayo qebul nêkerê, cinîyê makul mebê û semedê wayîr vejîyayîşê heqanê xo têkoşînî pîlêr bikerê.