Endama Koordînasyonê KJKyî Besê Erzîncan roportajê xo yê pelê fermî yê înternetî yê  KJKyî de Kurdîstan û pêro dinya de têkoşînê 2022yî ercna.

Cenabê to têkoşînê azadîye yê cinîyan ê 2022yî senî ercneno?

Ma 2022 pê xoverdayîş, têkoşîn û ruhê azadîye qedîna. Cinîyî hînî seba çareserîya pêro meseleyan serkêşîye kenê. Krîzê merdimatîye ancax pê şorişanê cinîyan qedîyenê. Tesbîtê 'Seserra 21. do biba serra azadîye' her roje raştîya xo eşkera kena. Her ke têkoşînê azadîye yê cinîyan berz beno sîstemê serdestîya camêrdan xîret keno ke verê ney bigêro. Na serdestîya camêrdan seba ke sîstemo ke kolonyalkerdişê ked, eql û bedenê cinîyan ser o ronîyayo, nêro rijnayene hêrişanê hîrayan kena.

Ma vînenê ke Şorişê Rojawan de dinya ser de hîna zaf veng vejeno. Cenabê to nê şorişê cinîyan senî pênase keno?

Şorişê Rojawanî çimeyê îlhamî yo. Şorişanê seserra 19. û 20. de cinîyî nêeşkayî rêxistinî, îdeolojî û sîstemanê xo ronê. Coka nê seserran de şorişê cinîyan nêeşkayî ser bikewê. Şorişê Cinîyan tim lazim bi. Karakterê şorişanê seserra 21. ganî hîna radîkal, xorin û estetîk bibê. Merdimatîye rê şorişê cinîyan lazim ê. Rayberîya ma waşt ke şorişanê cinîyan bi îlmê Jineolojî aver bera. Şorişê cinîyan do vera dewlet û îqtîdaran afernayîşê cuyêka azade ya alternatîf o. Şorişê Rojawanî wayîrê nê karakteran o.

Cenabê to derheqê serewedaritişê cinîyan ê Îran û Rojhelatê Kurdîstanî de û kokê ney de çi fikîrîyeno?

Formulê 'Jin, Jiyan, Azadî' yê Rayber Apoyî hînî bîyo global. Bi nê formulî enerjî, potansîyel û eqlê cinîyan vejîyayî werte. Nê hetî ra ma deyndarê Rayberê xo yê. 22 mengî yo Rayberê ma ra xeberêke çin a. Seba ke Rayberîye hende xeta azadîya cinîyan û têkoşînê cinîyan aver berdo yeno tecrîdkerdene. Erkê cinîyan o verên o ke nê tecrîdê Îmraliyî bişiknê. Azadîya Rayberîye azadîya cinîyan. Ma eşkenê bi xebat, çalakîyan û sîstemê xo dêsanê Îmraliyî bişiknê.

Kurdîstan de armancê hêrişanê vera cinîyan ê serkêşan çita yo?

Armancê nê hêrişan vergirewtişê têkoşînê cinîyan o. Dewleta tirke Başûr, Rojawan û Vakurê Kurdîstanî de seba ke verê xoverdayîşê cinîyan, Jineolojî û averşîyayîşê cinîyan bigêra cinîyan ê serkêşan kena hedef. Tewr peyên Paris de Evîne Goyî bi nê armancî ameye qetilkerdene. Ma emser embazê ercîyayeyî şehîd dayî. Ma do sey cinîyan ê kurdan her cade tewirê xoverdayîşî rê dewam bikerê.

Serrgêra 10. ya Qirkerdişê Parisî yê 9ê Çeleyê 2013yî de qirkerdişêko bîn ame kerdene. Cenabê to nê qirkerdişî senî ercneno?

Dewleta tirke 23yê kanûne de embazê ma Evîne Goyî, Mîr Perwer û Abdurrahman Kizil qetil kerdî. Fransa mesuldara nê qirkerdişî ya. Embaze Evîne bi hawayêkê plankerdeyî ameye qetilkerdene. Embaze Evîne embazêka fedakar û serkêşe bîye. Dewleta tirke vana qey pê nê hêrişan verê têkoşînê cinîyan bigêra. La eqsê ci cinîyî nê hêrişan ra dima hîna bi hêrs û xurtî têkoşînê xo rê dewam kenê.

Şima serra 2023yî senî pêşwazî kenê? Seba têkoşînê cinîyan taxmînê şima çita yê?

Serra 2023yî seba kurdan û cinîyan do biba serrêka krîtîke. Cinîyî ganî emser xopawitiş, ekononmî, perwerde, sîyaset, huqûq û warê kulturî de xo aver berê û rêxistinîya xo xurt tepişê.2023 hetê bînî ra do biba serra firsendanê azadîye. Ma sey têgêrayîşê cinîyan ê kurdan 2022 de bi hawayêkê bêemanî xo ver da. 2023 de xoverdayîş û xebatê ma yê awankerdişê cuya azade zî do wina bibê. Ez serra newîye sere de Rayber Apoyî rê pêro gerîlayan, keyeyanê şehîdan, dadîyan, gazîyan rê fîraz kena. Serra newîye de ma do ser bikewê, azadîye do ser bikewa.